जोशील चव्हाण असे ठार झालेल्या युवकाचे नाव असून, तो रेडवा ता. बार्शीटाकळी येथील रहिवासी आहे. बाळापूर तालुक्यात विद्युतखांब उभारण्याचे काम सुरू आहे. या कामाचे कंत्राट शहा नामक कंत्राटदाराकडे आहे. याकामी रेडवा व अन्य काही गावांतील मजूर आहेत. सायंकाळच्या सुमारास रिधोरा येथून वाडेगावकडे जात असलेला ट्रॅक्टर (क्र. एमएच ३० जे ३१२) ट्रॉलीसह राष्ट्रीय महामार्गावरील उतारावर उलटला. ट्राॅलीत दहा ते वीस लोखंडी खांब होते. ट्रॉली उलटताच जोशील खाली पडला. त्याच्या अंगावर लोखंडी खांब पडल्याने त्याचा जागीच मृत्यू झाला. घटनेची माहिती मिळताच बाळापूर पोलीस ठाण्याचे कर्मचारी, पोलीस उपनिरीक्षक वाणी, गिरीश वीर, महादेव पातोंड व वाहतूक शाखेचे विशाल इंगळे घटनास्थळी दाखल झाले.
फोटो :
तब्बल तीन तास मृतदेह पडून!
मृताच्या नातेवाइकांनी शाह नामक कंत्राटदाराला घेराव घालून मारहाण केली. नुकसानभरपाई द्या, अन्यथा मृतदेह उचलू देणार नाही असा पवित्रा त्यांनी घेतला होता. त्यामुळे घटनास्थळी तणाव निर्माण झाला होता. तब्बल तीन तास मृतदेह घटनास्थळी पडून होता. पोलिसांनी समजूत काढल्यानंतर मृतदेह रुग्णालयात हलवण्यात आला.