दहीहांडा पोलीस स्टेशनचे ठाणेदार प्रकाश अहिरे यांनी पदभार स्वीकारल्यानंतर या पोलीस ठाण्याच्या हद्दीतील अवैध धंदे तसेच देशी व विदेशी दारूची अवैधरीत्या होत असलेली विक्री बंद केली. त्यामुळे त्यांना लाच देण्याचे आमिष देऊन हे गोरखधंदे पुन्हा सुरू करण्याचा प्रयत्न काही जुगार माफियांनी केला होता; मात्र ठाणेदार प्रकाश अहिरे यांच्या तत्त्वांना हे पटणारे नसल्याने त्यांनी या माफियांची टाळाटाळ केली; मात्र तरीही ठाणेदार प्रकाश अहिरे यांच्यावर राजकीय दबाव आणून धंदे सुरू करण्याचा प्रयत्न त्यांनी केला. त्यामुळे ठाणेदार प्रकाश अहिरे यांनी जुगार माफिया लाचेचे आमिष देत असल्याची तक्रार अकोला लाचलुचपत प्रतिबंधक विभागाकडे केली. त्यानंतर लाचलुचपत प्रतिबंधक विभागाने २० आणि २१ मे रोजी पडताळणी केली असता शिवा गोपाळराव मगर (वय ३०), अभिजित रविकांत पागृत (३१, दोघे, रा. आकोट) व घनश्याम गजानन कडू (रा. लोतखेड, ता. अकोट) हे तिघे अवैध धंदे सुरू करण्यासाठी ५० हजार रुपये लाच देण्याचा प्रयत्न करीत असल्याचे समोर आले. त्यानंतर २५ हजार रुपयांचा पहिला हप्ता घेऊन हे तिघे शनिवारी पहाटे दहीहांडा पोलीस ठाण्यात पोहोचले. यावेळी सापळा रचून असलेल्या अकोला लाचलुचपत प्रतिबंधक विभागाने तीनही जुगार माफियांना २५ हजारांची लाच देत असताना रंगेहाथ अटक केली. या जुगार माफियांविरुद्ध दहीहंडा पोलीस ठाण्यात गुन्हे दाखल करण्यात आले आहेत. ही कारवाई लाचलुचपत प्रतिबंधक विभागाचे पोलीस अधीक्षक विशाल गायकवाड यांच्या मार्गदर्शनाखाली अकोला लाचलुचपत प्रतिबंधक विभागाचे प्रमुख शरद मेमाने व त्यांच्या कर्मचाऱ्यांनी केली.
रिव्हर्स ट्रॅपमुळे पोलिसांचे कौतुक
अकोला पोलीस दलातील एका अधिकाऱ्याने असा रिव्हर्स ट्रॅप केल्यामुळे अकोला पोलिसांचे कौतुक होत आहे. पोलीस अधीक्षक जी. श्रीधर यांच्या मार्गदर्शनात अकोला पोलिसांची वाटचाल योग्य दिशेने होत असल्याचे पुन्हा एकदा सिद्ध झाले आहे.
जिल्ह्यातील दुसरा रिव्हर्स ट्रॅप
यापूर्वी पोलीस अधीक्षक यांच्या विशेष पथकाचे प्रमुख यांना ५० हजार रुपयांची लाच देताना एका गुटखा माफियाविरुद्ध रिव्हर्स ट्रॅप करण्यात आला होता. त्यानंतर दहीहंडा पोलीस स्टेशनचे ठाणेदार प्रकाश अहिरे यांना लाच देण्याचा प्रयत्न करणाऱ्या तीन जुगार माफियांना बेड्या ठोकल्याने अकोला जिल्ह्यात हा दुसरा रिव्हर्स ट्रॅप झाल्याची माहिती आहे. राज्यातील हे एकमेव उदाहरण असल्याचेही वृत्त आहे.
अकोला पोलिसांची मान उंचावली
पोलीस अधीक्षक जी. श्रीधर यांनी काही महिन्यांपूर्वी दहीहांडा पोलीस स्टेशनचा पदभार ठाणेदार प्रकाश अहिरे यांच्याकडे दिला होता. त्यांनी परिसरातील अवैध धंदे बंद करण्यात यश मिळवले आहे. प्रकाश अहिरे यांना लाच देण्याचा प्रयत्न करणाऱ्या तीन जुगार माफियांना अटक झाल्यामुळे अकोला पोलिसांची मान उंचावली आहे. पोलीस अधीक्षक जी. श्रीधर, अतिरिक्त पोलीस अधीक्षक मोनिका राऊत यांच्या योग्य कामकाजाची ही पावतीच असल्याचे बोलले जात आहे.