बोरगाव मंजू, दि. १३- सततच्या नापिकीला कंटाळून कौलखेड जहॉगीर येथील दोन शेतकर्यांनी आत्महत्या केल्याची घटना १३ नोव्हेंबर रोजी उघडकीस आली. याप्रकरणी बोरगाव मंजू पोलिसांनी आकस्मिक मृत्यूची नोंद केली आहे.मिळालेल्या माहितीनुसार, कौलखेड जहा. येथील शेतकरी बंडू विठ्ठल तायडे (५५) यांनी नापिकीला कंटाळून गावाजवळील शेतशिवारात गळफास घेऊन आत्महत्या केली, तर गावातीलच रत्नाकर अरुण मेंढे (३५) यांनी राहत्या घरात गळफास लावून आत्महत्या केली. एकाच गावात दोन शेतकर्यांनी आत्महत्या केल्याने खळबळ उडाली आहे. रत्नाकर मेंढे यांनी १२ नोव्हेंबरच्या रात्री राहत्या घरात गळफास घेतला होता. ही बाब त्यांच्या कुटुंबीयांच्या लक्षात येताच त्यांना तातडीने मूर्तिजापूर येथील उपजिल्हा सामान्य रुग्णालयात दाखल करण्यात आले; परंतु डॉक्टरांनी त्यांना मृत घोषित केले. दोन्ही प्रकरणांचा पुढील तपास ठाणेदार पी. के. काटकर यांच्या मार्गदर्शनात पोलीस करीत आहेत.
कौलखेड जहागीर येथील दोन शेतक-यांच्या आत्महत्या
By admin | Updated: November 14, 2016 03:04 IST