महावितरणकडून दरवर्षी सुमारे ८ ते ९ लाख नवीन वीजजोडण्या कार्यान्वित करण्यात येतात. मार्च २०२० नंतर कोरोना प्रादुर्भाव व ‘लॉकडाऊन’मुळे नवीन वीज मीटरची उपलब्धता काही प्रमाणात कमी झाली होती. मीटरअभावी ग्राहकांची कोणतीही गैरसोय होऊ नये म्हणून उपलब्ध झालेले वीज मीटर तातडीने ग्राहकांपर्यंत पोहोचविण्याचे निर्देश मुख्य कार्यालयाकडून निर्गमित करण्यात आलेले आहेत.
नवे १ लाख ४४ हजार मीटर प्राप्त
नव्याने प्राप्त झालेले १ लाख ४४ हजार ९०४ वीज मीटर सद्य:स्थितीत महावितरणच्या प्रादेशिक कार्यालयांना देण्यात आले आहेत. यापैकी पुणे प्रादेशिक कार्यालयाकडे ३८ हजार ७०४, कोकण प्रादेशिक कार्यालयाकडे ६९ हजार ७००, नागपूर प्रादेशिक कार्यालयाकडे २० हजार तर औरंगाबाद प्रादेशिक कार्यालयाकडे १६ हजार ५०० या प्रमाणात वीज मीटर उपलब्ध करून देण्यात आलेले आहेत.
ऑगस्टअखेरपर्यंत मिळणार १४ लाख मीटर
सद्य:स्थितीत महावितरणला दररोज सुमारे ८ ते १० हजार नवीन वीज मीटरचा पुरवठा सुरू झाला असून, मार्चअखेर सिंगल फेजचे ३ लाख २० हजार आणि थ्री फेजचे ६० हजार नवीन मीटर उपलब्ध होणार आहेत. तसेच एप्रिल ते ऑगस्ट-२०२१ पर्यंत सिंगल व थ्री फेजचे तब्बल १४ लाख ६० हजार नवीन वीज मीटर उपलब्ध होणार आहेत. महावितरणच्या क्षेत्रीय कार्यालयांमध्ये सध्या सिंगल फेजचे २ लाख ४१ हजार ८८२, तर थ्री फेजचे २८ हजार ३८६ नवीन वीज मीटर उपलब्ध असून वीज मीटरचा कोणताही तुटवडा भासणार नाही. ग्राहकांनी खुल्या बाजारातून वीज मीटर खरेदी करण्याची आवश्यकता नाही, असे आवाहन महावितरणकडून करण्यात आले आहे.