शिवणीमध्ये दोन गटात हाणामारी

दगडफेक व काठय़ांनी हल्ला; सहा जण जखमी.

अकोला - शिवणीमधील विहारासमोर उभ्या राहणार्‍या युवकांना विचारणा केल्यावरून रविवारी रात्री दोन गटात प्रचंड हाणामारी झाल्याची घटना घडली. दोन्ही गटातील युवकांनी परस्परांना काठय़ांनी मारहाण करीत दगडफेक केल्याने सहा जण जखमी झाले आहेत. त्यांच्यावर खासगी व सवरेपचार रुग्णालयात उपचार करण्यात येत असून, या वादामुळे शिवणी परिसरात तणाव निर्माण झाला आहे. शिवणी येथील राहुलनगरमधील विहारासमोर काही युवक गत काही दिवसांपासून उभे राहतात. त्यामुळे याच परिसरातील काही नागरिकांनी त्यांना येथे उभे राहण्यावरून विचारणा केली असता, या युवकांनी त्यांच्याशी वाद घातला. काही वेळातच वाद वाढल्याने दोन गट समोरा-समोर उभे ठाकले. त्यानंतर दोन्ही गटातील युवकांनी एकमेकांवर दगडफेक करीत काठय़ांनी मारहाण सुरू केली. या हाणामारीत पाच ते सहा जण जखमी झाले असून, त्यांना खासगी रुग्णालय व सवरेपचार रुग्णालयात दाखल करण्यात आले आहे. यामधील संदीप नामक एक युवक गंभीर जखमी असून, त्याच्यावर सवरेपचार रुग्णालयात उपचार सुरू आहेत. या हाणामारीत दोन्ही गटातील पाच ते सहा जण जखमी झाल्यानंतर नागरिकांनी काहींना खासगी रुग्णालयात उपचारासाठी दाखल केले असून, संदीप नामक युवकास सवरेपचार रुग्णालयात दाखल करण्यात आले.