बनावट दस्तावेजाद्वारे प्लॉटची विक्री

नागपूरचे चौघे पोलिसांच्या ताब्यात ; स्टेट बँक शाखाधिका-यांच्या दक्षतेमुळे उघडकीस आला प्रकार.

अकोला : नागपूर येथील वाडी परिसरात असलेल्या प्लॉटची बनावट दस्तावेजाद्वारे २५ लाखात विक्री करणार्‍या नागपूर येथील चार जणांना सिव्हिल लाईन्स पोलिसांनी सोमवारी दुपारी संशयावरून ताब्यात घेतले. बनावट दस्तावेजाद्वारे शिवणीतील स्टेट बँकेत उघडलेल्या एका खात्यात १४ लाखांची रक्कम जमा झाल्यानंतर बँक व्यवस्थापकाच्या दक्षतेमुळे फसवणुकीचा हा प्रकार उजेडात आला. नागपूर येथील प्रॉपर्टी ब्रोकर आशीष झा याने निखिल रामचंद्र शिंदे, सादिक शहा व किशोर ढाले या तिघांना सोबत घेऊन संगनमताने बनावट दस्तावेजाद्वारे वाडी परिसरातील एका प्लॉटच्या खरेदी-विक्रीचा व्यवहार काही दिवसांपूर्वी केला होता. हा प्लॉट एका इसमास २५ लाखात विकल्यानंतर ही रक्कम जमा करण्यासाठी निखिल शिंदे याने येथील जठारपेठ परिसरातील महेंद्र आळशी यांच्या नावाचे बनावट मतदान ओळखपत्र तयार केले. या मतदान ओळखपत्राच्या आधारे शिवणीमधील भारतीय स्टेट बँकेच्या शाखेत खाते उघडले. या खात्यात २ हजार ५00 रुपयांची रक्कम शिंदेने ठेवली होती. त्यानंतर काही दिवसांनी खरेदीदाराने १४ लाख रुपयांची रक्कम या खात्यात जमा केली. ही रक्कम जमा होताच रक्कम काढण्यासाठी आशीष झा, निखिल शिंदे, सादिक शहा व किशोर ढाले सोमवारी एम एच ४0 एसी ४५५९ या कारने अकोल्यात दाखल झाले. स्टेट बँकेत गेल्यानंतर बँक व्यवस्थापक नयना कांबळे यांना खात्यातील रकमेवरून संशय आल्याने त्यांनी आळशी यांच्या नावाचे खाते गोठवीत चारही जणांची माहिती घेण्याचा प्रयत्न केला; मात्र त्यांनी बँक व्यवस्थापकाशी वाद घातला. याचवेळी शिवणीत ग्रामपंचायत सरपंचपदासाठी निवडणूकसुरू असल्याने सिव्हिल लाइन्स पोलीस ठाण्याचे पप्पू ठाकूर व उमेश सुगंधी तेथेच उपस्थित होते. त्यांना या वादाची माहिती मिळताच त्यांनी तातडीने घटनास्थळ गाठून चारही जणांना ताब्यात घेतले. त्यांना ठाण्यात आणून कसून चौकशी केल्यानंतर बनावट मतदान ओळखपत्र व कार जप्त करण्यात आली. या प्रकरणाची माहिती नागपूर पोलिसांना देण्यात आली असून त्यांच्या चौकशीनंतर या प्रकरणी फसवणुकीचा गुन्हा दाखल होणार असल्याची माहिती पोलीस सूत्रांनी दिली.