अकोला : अकोट फाइल पोलीस ठाण्याच्या हद्दीतील पूरपीडित कॉलनी येथे सुरू असलेल्या जुगार अड्ड्यावर शहर पोलीस उपअधीक्षक सचिन कदम यांच्या विशेष पथकाने सोमवारी छापा टाकला. या ठिकाणावरून सहा जुगाऱ्यांना अटक करण्यात आली असून, त्यांच्याकडून मुद्देमाल जप्त करण्यात आला आहे.
पूरपीडित कॉलनी येथे मोठ्या प्रमाणात जुगार अड्डा सुरू असल्याची माहिती शहर पोलीस उपअधीक्षक यांच्या विशेष पथकाला मिळाली. या माहितीवरून त्यांच्या पथकाने सापळा रचून छापा टाकला. त्यानंतर या जुगारावरून रमेश हरारे, रामेश्वर गायबोळे, राजा चंदन, सय्यद कासिफ सय्यद मुसा, धीरज यादव या पाच जणांना ताब्यात घेतले. हा जुगार अड्डा चालविणारा उस्मान शाह लुकमान शाह राहणार पूरपीडित कॉलनी हा फरार झाला असून, पोलीस त्याचा शोध घेत आहेत. या अड्ड्यावरून वीस हजार रुपयांचा मुद्देमाल जप्त करण्यात आला आहे. त्यांच्याविरूद्ध अकोट फाइल पोलीस ठाण्यात गुन्हा दाखल करण्यात आला आहे. ही कारवाई पोलीस अधीक्षक जी. श्रीधर, अतिरिक्त पोलीस अधीक्षक मोनिका राऊत, शहर पोलीस उपअधीक्षक सचिन कदम यांच्या मार्गदर्शनाखाली त्यांच्या विशेष पथकाने केली.