सोयाबीन पुन्हा आठ हजारी!
अकोला : खरीप हंगाम असल्याने बाजार समितीत आवक कमी आहे; परंतु सोयाबीनला दिवसेंदिवस विक्रमी दर मिळत आहे. शुक्रवारी बाजार समितीत सोयाबीनला जास्तीत जास्त आठ हजार रुपये प्रती क्विंटल दर मिळाला.
१८ ते २० जुलैला पावसाची शक्यता
अकोला : जिल्ह्यात जुलै महिन्यात चांगला पाऊस झाला आहे. आणखी १८ ते २० जुलै दरम्यान जिल्ह्यात पावसाची शक्यता हवामान विभागाने वर्तविली आहे. काही ठिकाणी मध्यम स्वरुपाचा पाऊस होण्याची शक्यता आहे.
वरोडीत रोगप्रतिकारशक्ती किटचे वाटप
अकोला : वरोडी गावामध्ये एशियन फ्रेंडशिप सोसायटी आणि एचडीएसआय व एएफएस सोसायटी यांच्या संयुक्त विद्यमाने ग्रामस्थांना रोगप्रतिकारशक्ती बुस्टर किटचे वितरण करण्यात आले. यावेळी संस्थेचे अध्यक्ष धनराज गवई, महेंद्र थोरात, नोयल थोरात, सरपंच विजय देवरे यांनी मार्गदर्शन केले. जगन्नाथ वरघट यांनी सूत्रसंचालन केले, तर हांडे यांनी आभार मानले.
बाळापूर नाका परिसरातील रेशन दुकानावर गर्दी
अकोला : अंत्योदय, प्राधान्य, तसेच पंतप्रधान गरीब कुटुंब कल्याण योजनेअंतर्गत सामान्य नागरिकांना रेशन देणे सुरू आहे. शुक्रवारी बाळापूर नाका परिसरातील एका रेशन दुकानामध्ये गर्दी झाली होती. लाभार्थी रांगेत उभे राहण्याऐवजी गोंधळ करताना दिसून आले. या ठिकाणी सोशल डिस्टन्सिंगचा फज्जा उडाला होता.
गावरान गूळ ४० रुपये किलो!
अकोला : गुळाचे दर हे साखरेपेक्षा अधिक आहे. सद्य:स्थितीत गावरान गुळाला ४० रुपये किलो दर मिळत आहे, तर कोल्हापुरी गुळाला ५५ रुपये किलो दर मिळत आहे. ग्राहकांकडून गुळाची मागणी वाढल्याचे विक्रेत्यांनी सांगितले.