अविश्‍वास प्रस्ताव, निधी वाटपावर खलबत

अकोला मनपात महापौर, गटनेत्यांची बैठक.

अकोला: मनपा उपायुक्त दयानंद चिंचोलीकर यांच्याविरोधात अविश्‍वास प्रस्ताव दाखल करण्यासाठी पुन्हा स्थगित सभा आयोजित करण्यासह ५ कोटींच्या रस्ता अनुदान वाटपावर मनपात खलबतं करण्यात आली. महापौर उज्ज्वला देशमुख यांच्या दालनात सर्व पक्षीय गटनेत्यांची बैठक बुधवारी पार पडली. महापालिकेला रस्ता अनुदानाचे ५ कोटी रुपये प्राप्त झाले. प्राप्त निधीचे समान वाटप करण्यासाठी समन्वय साधण्याचा सत्तापक्षाने प्रथमच प्रयत्न केल्याचे दिसून आले. महापौर उज्ज्वला देशमुख यांच्या दालनात पार पडलेल्या बैठकीत उपायुक्त दयानंद चिंचोलीकर यांच्या विरोधात अविश्‍वास प्रस्ताव आणण्यासाठी २ डिसेंबर रोजीच्या स्थगित सभेवर चर्चा करण्यात आली. पुन्हा सभा घ्यायची किंवा नाही, यावर बैठकीत मंथन करण्यात आल्याची माहिती आहे. दरम्यान, आगामी काळात शहर विकासासाठी मनपाला अनुदान प्राप्त होण्याची चिन्हं आहेत. निधी वाटपात कोणताही पक्षीय भेदभाव होणार नसल्याचे सत्तापक्षाने यावेळी नमूद केले. रस्ता अनुदानापोटी मनपाला ५ कोटींचा निधी प्राप्त झाला असून, सत्तापक्षाला ६0 टक्के तर विरोधी पक्षाला ४0 टक्के निधी देण्यावर चर्चा झाली. महापौर, उपमहापौर यांना प्रत्येकी २५ लाख तर गटनेत्यांना किमान १५ लाख निधीचे वाटप केल्या जाणार असल्याची माहिती आहे. स्थगित सभेचे आयोजन करण्यासाठी ६ जानेवारीपर्यंत प्रभारी आयुक्त शिवाजी दिवेकर उपलब्ध नाहीत. तर १0 जानेवारी ते १५ जानेवारीपर्यंंत महापौर उपलब्ध नसतील. त्यामुळे १६ जानेवारीनंतरच सभा घेता येईल, यावरही चर्चा करण्यात आली.