अकोला जिल्ह्यात १८ हजारांवर नवीन मतदारांची नोंदणी

मतदार याद्यांचा संक्षिप्त पुनरिक्षण कार्यक्रम.

अकोला: जिल्ह्यात गेल्या पंधरा दिवसांत मतदार याद्यांचा विशेष संक्षिप्त पुनरिक्षण कार्यक्रम राबविण्यात आला. त्यामध्ये जिल्हय़ात १८ हजार ५५५ नवीन मतदारांची नोंदणी करण्यात आली. जिल्हा प्रशासनामार्फत गत १ ते १६ डिसेंबरदरम्यान राबविण्यात आलेल्या मतदार याद्यांच्या पुनरिक्षण कार्यक्रमात १ जानेवारी २0१५ रोजी वयाच्या १८ वर्षावरील नवीन मतदारांचे नाव मतदार यादीत समाविष्ट करण्यासाठी नमुना अर्ज क्र.६, मतदार यादीतील मतदारांच्या नावात दुरुस्ती करण्यासाठी नमुना अर्ज क्र.८, तसेच मतदार यादीतून नाव वगळण्यासाठी नमुना अर्ज क्र.७ मतदान केंद्रांवर स्वीकारण्यात आले. तसेच ज्या मतदारांचे नाव मतदार यादीत आहे, मात्र फोटो नाही, अशा मतदारांकडून मतदान केंद्रस्तरीय अधिकार्‍यांकडून (बीएलओ) पासपोर्ट आकाराचे फोटो जमा करण्यात आले. जिल्ह्यातील आकोट, तेल्हारा, बाळापूर, पातूर, अकोला, मूर्तिजापूर व बाश्रीटाकळी या सातही तालुक्यांमध्ये नमुना अर्ज क्र.६ भरलेल्या १८ हजार ५५५ नवीन मतदारांच्या नावांची नोंदणी मतदार यादीत करण्यात आली. तसेच मतदार यादीतून नाव वगळण्यासाठी सातही तालुक्यांमध्ये ७८८ मतदारांचे नमुना क्र. ७ चे अर्ज प्राप्त झाले आणि मतदार यादीतील नावात दुरुस्ती करण्यासाठी २ हजार ५७0 मतदारांकडून नमुना क्र. ८ चे अर्ज प्राप्त झाले.