नवजात नेत्रदात्याच्या पालकांना नेत्रकमल पुरस्कार

नेत्रकमलांजली करणार १0५ कुटुंबीयांचा सत्कार.

अकोला : पाच दिवसीय नवजात बालकाच्या मृत्यूनंतर त्या बालकाचे नेत्रदान करण्याचा निर्णय त्याचे वडील धनंजय सोनोने यांनी घेतल्याने नेत्रदान चळवळीला आदर्श निर्माण झाले आहे. त्या अनुषंगाने नेत्रकमलांजलीच्या वतीने सोनोने कुटुंबीयांना यंदाच्या नेत्रकमल पुरस्काराने गौरविण्यात येणार असल्याचे डॉ. चंद्रकांत पनपालिया यांनी सांगितले. राष्ट्रीय नेत्रदान दिनानिमित्त ६ सप्टेंबर रोजी नेत्रकमलांजलीच्या वतीने नेत्रदात्यांच्या कुटुंबीयांच्या सन्मान सोहळ्य़ाचे आयोजन करण्यात आले आहे. या संदर्भात मंगळवारी आयोजित पत्रकार परिषदेत माहिती देताना डॉ. चंद्रकांत पनपालिया बोलत होते. आयोजित सोहळ्य़ामध्ये जालन्यातील फालेगाव येथील धनंजय सोनोने यांना पालकमंत्री डॉ. रणजित पाटील यांच्या हस्ते नेत्रकमल पुरस्काराने गौरविण्यात येणार आहे. सोनोने यांनी त्यांच्या पाच दिवसीय बालकाच्या मृत्यूपश्‍चात त्याचे नेत्रदान करून नेत्रदान चळवळीसाठी आदर्श ठेवला आहे. तसेच या व्यतिरिक्त १0५ नेत्रदात्यांच्या कुटुंबीयांना गौरविण्यात येणार असल्याचे डॉ. पनपालिया यांनी सांगितले. कार्यक्रमाच्या अध्यक्षस्थानी आमदार गोपीकिशन बाजोरिया यांची उपस्थिती राहणार आहे. पत्रकार परिषदेला डॉ. श्याम पनपालिया, सुधीर रांदड, जीवनलाल राठी, अरविंद सोनी यांची उपस्थिती होती.