मनपा आवारात कचरा टाकणे पडणार महागात

राष्ट्रवादीचे आंदोलन; प्रशासन पोलिस तक्रार करण्याच्या तयारीत

अकोला : शहरात सर्वत्र पसरलेली घाण व अशुद्ध पाणी पुरवठ्याच्या मुद्यावर मंगळवारी राष्ट्रवादी युवक काँग्रेसच्यावतीने मनपा प्रशासनाच्या निषेधार्थ आयुक्त डॉ. महेंद्र कल्याणकर यांच्या कार्यालयासमोर कचरा टाकण्यात आला. हा कचरा टाकणे राष्ट्रवादीला महागात पडण्याची शक्यता असून, याप्रकरणी पोलिस तक्रार करण्याच्या हालचाली प्रशासनाने सुरू केल्याची माहिती आहे.महापालिकेचे नियोजन पुरते ढेपाळले असून, प्रशासनाच्या दुर्लक्षामुळे शहराच्या कानाकोपर्‍यात घाण व कचर्‍याचे ढीग साचले आहेत. अशुद्ध पाणीपुरवठ्यामुळे नागरिक त्रस्त झाल्याचा मुद्दा उपस्थित करीत राष्ट्रवादी युवक काँग्रेसच्यावतीने प्रशासनाच्या निषेधार्थ आयुक्तांच्या कार्यालयासमोर कचरा टाक ण्यात आला. निवेदन घेण्यासाठी आयुक्त उपस्थित नसल्याने संतप्त कार्यकर्त्यांनी प्रशासनाविरोधात नारेबाजी केली. प्रभारी उपायुक्त चंद्रशेखर गुल्हाणे हजर नसल्यामुळे उपायुक्त डॉ. उत्कर्ष गुटे यांनी निवेदन स्वीकारले. यावेळी माजी स्थायी समिती सभापती पप्पू शर्मा, नितीन झापर्डे, बुढन गाडेकर, संदीप बाथो, देवानंद राऊत, युवराज फोकमारे, गोविंद पांडे, अमोल अवचार, मंगेश चोपडे, सचिन पाटील, आशीष शिरसाट, अश्विन दाते,पवन भिरड, राहुल कोरपे, मुन्ना पांडे, जगदीश देशमुख आदी कार्यकर्ते उपस्थित होते.**  पोलिस तक्रार होणार?मनपा आवारात आंदोलन करून घाण व कचरा टाकणार्‍या राकाँच्या आंदोलनकर्त्या कार्यकर्त्यांविरुद्ध पोलिस तक्रार करण्याचे निर्देश आयुक्तांनी संबंधित अधिकार्‍यांना दिले. एकीकडे पोलिसात तक्रार करण्याचे निर्देश द्यायचे अन् दुसरीकडे राकाँच्या काही पदाधिकार्‍यांना बुधवारी सकाळी चर्चेसाठी बोलवायचे,अशी विचित्र भूमिका प्रशासनाने घेतल्याची माहिती आहे.