गत काही महिन्यांपासून एमपीएससीच्या परीक्षांचा मोठा घोळ सुरू आहे. आतापर्यंत राज्यसेवा पूर्व परीक्षा वेगवेगळ्या कारणांमुळे पाचव्यांदा पुढे ढकलण्यात आली आहे. एमपीएससीने राज्यसेवा पूर्व परीक्षा २१ मार्च रोजी घेण्याचा निर्णय घेतला आहे.
या निर्णयाचा रेल्वेची परीक्षा देणाऱ्या विद्यार्थ्यांना फटका बसणार आहे. रेल्वेकडून विविध पदांसाठी देशभरात विविध केंद्रांवर पाच टप्प्यांत परीक्षा घेण्यात येत आहेत.
येत्या २१ मार्चला देशभरातील विविध केंद्रांवर ही परीक्षा होणार आहे. त्यामुळे रेल्वेसह एमएपीएससीच्या परीक्षेची तयारी करणाऱ्या जिल्ह्यातील विद्यार्थ्यांना आता यातील कोणतीही एकच परीक्षा देणे शक्य होणार आहे.
--बॉक्स--
रेल्वेच्या परीक्षा पूर्वनियोजित
रेल्वेच्या ३२ हजार २०८ जागांसाठी पाच टप्प्यांत ऑनलाइन पद्धतीने परीक्षा घेण्यात येत आहेत. सध्या पाचव्या टप्प्यातील परीक्षा सुरू आहेत. देशभरातील १९ लाख विद्यार्थी ही परीक्षा देत आहेत. यामध्ये राज्यातील विद्यार्थ्यांचाही समावेश आहे. रेल्वेची पूर्वनियोजित परीक्षा असतानाही एमपीएससीनेही त्याच तारखेला परीक्षा घेण्याची घोषणा केली आहे. त्यामुळे राज्यातील हजारो विद्यार्थी एका परीक्षेपासून वंचित राहणार आहेत.
--बॉक्स--
विद्यार्थ्यांना भुर्दंड
लॉकडाऊननंतर शहरांमध्ये अभ्यास करण्यासाठी गेलेले विद्यार्थी गावी परतले आहेत. या विद्यार्थ्यांनी १४ मार्चला होणाऱ्या परीक्षेला जाण्यासाठी रेल्वेचे आरक्षणही केले होते. मात्र, ऐनवेळेवर एमपीएससीने परीक्षा पुढे ढकलल्याने विद्यार्थ्यांना नाहकचा भुर्दंड बसला आहे, तर आता ही परीक्षा २१ मार्च रोजी घेण्याचे जाहीर केल्याने त्यांना पुन्हा आरक्षण करावे लागत असून, यासाठी त्यांची धडपड सुरू आहे.
--बॉक्स--
लॉकडाऊनमुळे अडचण
कोरोना संसर्ग वाढत असल्याने राज्यातील अनेक जिल्ह्यांमध्ये लॉकडाऊन करण्यात आले आहे. एमपीएससीने परीक्षा पुढे ढकलल्याने विद्यार्थ्यांना परीक्षा केंद्रांवर पोहोचण्यासाठी कसरत करावी लागणार आहे. तसेच हॉटेल बंद राहणार असल्याने घरच्या शिदोरीवरच परीक्षा द्यावी लागणार आहे. लॉकडाऊन असलेल्या शहरामध्ये राहण्याची सोय होणार नसल्याने परीक्षेला वेळेत पोहोचण्यासाठी धडपड करावी लागणार आहे.
--जिल्ह्यातील १८ केंद्रांवर परीक्षा--
एमपीएससीची परीक्षा २१ मार्च रोजी होणार आहे. जिल्हा मुख्यालय असलेल्या अकोला जिल्ह्यातील १८ परीक्षा उपकेंद्रांवर ४ हजार ९९२ विद्यार्थी या परीक्षेला बसणार आहेत. सकाळी १० ते दुपारी १२ आणि दुपारी ३ ते ५ वाजेपर्यंत ही परीक्षा घेतली जाणार आहे. या परीक्षेकरिता नियुक्त अधिकारी, कर्मचाऱ्यांना १८ मार्चपर्यंतच आरटीपीसीआर चाचणी अनिवार्य करण्यात आली आहे.