मोटारसायकलींची समोरासमोर धडक; एक ठार, तीन जखमी

राष्ट्रीय महामार्गावरील डोंगरगाव बसथांब्याजवळ अपघात.

डोंगरगाव/वणीरंभापूर (जि. अकोला) : दोन भरधाव मोटारसायकलींची समोरासमोर धडक होऊन झालेल्या अपघातात एक जण घटनास्थळावरच ठार, तर अन्य तीन जण गंभीर जखमी झाल्याची घटना गुरुवार, १ ऑक्टोबरला दुपारी ४ वाजताच्या सुमारास राष्ट्रीय महामार्गावरील डोंगरगाव बसथांब्याजवळ घडली. उरळ पोलीस स्टेशनांतर्गत डोंगरगाव येथील रहिवासी असलेले बब्रुवान तुळशीराम इंगळे (४0) व त्यांची पत्नी माया इंगळे (३५) हे माया इंगळेच्या माहेरी वणी रंभापूर येथे अकोलाकडून एमएच ३0 वाय १४४५ क्रमांकाच्या मोटारसायकलने जात होते. याचवेळी एमएच ३0 एपी ८२४0 क्रमांकाच्या मोटारसायकलवरून संतोष राऊत व गजानन ठाकरे हे बोरगावकडून अकोलाकडे जात होते. दरम्यान, या दोन्ही मोटारसायकलींची डोंगरगाव बसथांब्याजवळ समोरासमोर धडक झाली. या अपघातात एमएच ३0 वाय १४४५ वरील बब्रुवान इंगळे (४0) हे घटनास्थळावरच ठार झाले, तर माया इंगळे या गंभीर जखमी झाल्या. दुचाकी क्रमांक एमएच ३0 एपी ८२४0 वरील डोंगरगाव येथील संतोष राऊत व शिवर येथील गजानन ठाकरे हेदेखील जखमी झाले. दरम्यान, बोरगाव मंजू येथील ज्ञानेश्‍वर वानखडे अकोलाकडे जात असता त्यांना हा अपघात दिसला. त्यांनी जखमींना मदत केली. या घटनेची माहिती बोरगाव मंजू पोलिसांना दिली. ठाणेदार भास्कर तंवर, हेकाँ. गणेश निमकर्डे, अवधूत कांबळे, जुनगडे यांनी धाव घेतली. सदर जखमींना उपचाराकरिता सवरेपचार रुग्णालय अकोला येथे पाठविले. दरम्यान, वृत्त लिहिस्तोवर पोलीस तपास सुरू होता. गुन्ह्याची नोंद झाली नव्हती.