मिनी ट्रकची धडक; दुचाकीस्वार ठार

सिंधी कॅम्परोडवरील घटना.

अकोला: सिंधी कॅम्पमधून कौलखेडकडे जात असलेल्या एका भरधाव मिनी ट्रकने समोरून येणार्‍या दुचाकीला जबर धडक दिल्याची घटना मंगळवारी दुपारी एसटी वर्कशॉपसमोर घडली. या अपघातात दुचाकीस्वाराच्या डोक्याला गंभीर दुखापत झाल्याने त्याचा जागेवरच मृत्यू झाला असून या प्रकरणी खदान पोलिसांनी चालकाविरुद्ध गुन्हा दाखल केला आहे. शहरालगत असलेल्या चांदूर येथील रहिवासी सैय्यद ताहेर अली सैय्यद अब्दुल (६५) हे चांदूरवरून एम एच ३0 एडी ५0१५ क्रमांकाच्या दुचाकीने शहरात येत असताना समोरून येणार्‍या एम एच ३0 एबी ३१८७ मिनी ट्रकने त्यांच्या दुचाकीला जबर धडक दिली. या जबर धडकेमुळे सैय्यद ताहेर अली दुचाकीवरून खाली कोसळले. त्यामुळे डोक्याला गंभीर दुखापत झाल्याने त्यांना उपचारासाठी सवरेपचार रुग्णालयात नेण्यात येत असतानाच त्यांचा वाटेतच मृत्यू झाला. या अपघाताची माहिती मिळताच खदान पोलीस तातडीने घटनास्थळावर दाखल झाले. त्यांनी घटनास्थळ पंचनामा करून मृतदेह उत्तरीय तपासणीसाठी सवरेपचार रुग्णालयात पाठविला. या प्रकरणी मिनी ट्रक चालकाविरुद्ध गुन्हा दाखल करण्यात आला आहे.