बुलडाणा : संजय गांधी निराधार योजनेच्या लाभार्थ्यांना योजनेचा लाभ मिळावा, यासाठी निराधार समितीच्या बैठका वर्षभरात किमान आठवेळा ठरवून दिलेल्या तारखेला घेण्याचे आदेश सामाजिक न्याय विभागाने दिले आहेत. त्यामुळे प्रलंबित प्रकरणांचा निपटारा होण्यासाठी मदत होणार आहे. संजय गांधी निराधार योजनेतून निराधार व्यक्तींना दरमहा निश्चित वेतन देण्यात येते; मात्र या योजनेतून लाभार्थ्यांना अर्ज केल्यानंतर दोन-दोन वर्षानंतरही लाभ मिळत नसल्याच्या तक्रारी प्रत्येक तहसील कार्यालयात दाखल होत आहेत. या तक्रारींचे निरसन करण्यासाठी तसेच प्रलंबित प्रकरणाचा निपटारा होण्याच्या दृष्टीकोनातून सामाजिक न्याय विभागाने ४ ऑगस्ट रोजी मार्गदर्शक सूचना दिल्या आहेत. यापुढे वर्षभरात निराधार समितीच्या आठ बैठका निश्चित केलेल्या तारखेच्या दिवशी घेण्याचे आदेश देण्यात आले आहेत. यात ३ जानेवारी क्रांतीज्योती सावित्रीबाई फुले जयंती, १0 मार्च सावित्रीबाई फुले पुण्यतिथी, ११ ते १४ एप्रिल महात्मा ज्योतीबा फुले जयंती व डॉ.बाबासाहेब आंबेडकर जयंती, २७ मे रमाबाई आंबेडकर यांची पुण्यतिथी, २६ जून राजङ्म्री छत्रपती शाहू महाराजांचा जन्मदिवस, १५ ऑगस्ट स्वातंत्र्यदिन, २ ऑक्टोबर महात्मा गांधी जयंती व ६ डिसेंबर डॉ.बाबासाहेब आंबेडकर महापरिनिर्वाण दिन यांचा समावेश आहे. या दिवशी शासकीय सुट्टी किंवा अन्य रजा येत असल्यास या तारखेच्या पुर्वीच्या किंवा नंतरच्या तीन दिवसाची तारीख निश्चित करण्याचे आदेशात नमूद केले आहे. संजय गांधी निराधार योजनेचे अध्यक्ष बैठकीस गैरहजर राहिल्यास तहसिलदारांच्या अध्यक्षतेखाली समितीच्या बैठका घेण्याचे स्पष्ट आदेश देण्यात आले आहेत.
*तहसीलदारांवर जबाबदारी
सामाजिक न्याय विभागाने दिलेल्या तारखेस बैठका घेण्याची संपूर्ण जबाबदारी प्रत्येक तालुक्याच्या तहसिलदारांवर सोपविण्यात आली आहे. या दरम्यान बैठका न झाल्यास तहसिलदारांना जबाबदार धरण्यात येणार आहे. बैठक इनकॅमेरा घेण्याचे निर्देशही देण्यात आलेत.