मूर्तिजापूर : लॉकडाऊनने भल्याभल्यांना वाट दाखवली. त्यात मोठ्या व्यवसायापासून ते किरकोळ मजूरही भरडले गेले. अनेकांचा यामुळे रोजगार गेला आहे, तर कित्येक जणांवर उपासमारीची वेळ आली आहे. याकाळात लग्न समारंभात मोजक्याच लोकांना परवानगी देण्यात आली. वाजंत्री व्यवसायाला परवानगी नसल्याने या व्यावसायिकांना आपल्या उदरनिर्वाहासाठी टोपले, सूप, फळे विकण्यासह हात मजुरीची कामे करावी लागत आहेत. कोरोना प्रादुर्भावामुळे गत वर्षापासून अनेक लहानमोठे व्यवसाय संकटात आले आहेत. याचा परिणाम हात मजुरांनाही भोगावा लागला. कोरोना काळात लग्न मंडपी वऱ्हाडी मंडळी लग्नसोहळ्यात एकत्र येण्यास बंधने असल्याने व मोजक्याच लोकांच्या उपस्थितीत विवाह पार पडण्याची परवानगी असल्याने धुमधडाक्यात लग्न करणाऱ्यांचे मनसुबे पार धुळीस मिळाले आहेत. या कालावधीत विवाह समारंभ मोजकेच पार पडत असल्याने, या समारंभात मुख्य भूमिका असलेल्या वाजंत्री वाजविणाऱ्यांचा व्यवसायसुद्धा ठप्प झाल्याने अनेकांवर उपासमारीची पाळी आली आहे. परंपरागत व्यवसाय म्हणजे वाजंत्री वाजविणे व बांबू आणि शिंदोळी झाडापासून फळे बनविणे यासाठी कुशल हस्त कारागिरीने ते टोपले, सुप, झाडू, आदी घरगुती कामासाठी लागणाऱ्या विशिष्ट वस्तू बनवतात. परंतु वाजंत्री वाजविणे हा मुख्य व्यवसाय आहे. हाच व्यवसाय गत दीड वर्षभरापासून बंद असल्याने अनेकांवर उपासमारीची वेळ आली आहे. बँड व्यवसायाचे संचालकही हतबल झाले असून, त्यांनाही इतर कामे करावी लागत आहेत. काहींनी तर बँडसाठी वापरण्यात येत असलेल्या गाडीवरच आपला टोपले, सूप विक्रीचा व्यवसाय थाटला आहे. बँड पार्टीत मजुरी दाखल वाजंत्री वाजविण्याचे काम करीत असणाऱ्या कलाकारांचा हा व्यवसाय बंद पडल्याने उपासमारीची वेळ आली आहे, तर काही इतर किरकोळ मजुरी करून आपल्या संसाराचा गाडा ओढून आपली उपजीविका भागवीत आहेत.
शासकीय मदत देण्याची गरज
शासकीय मदत व्हावी
इतर कलावंतांना मानधन म्हणून शासनातर्फे मदत केली जाते. त्याच धर्तीवर आर्थिक उणीव भरून काढण्यासाठी वाजंत्री कलावंतांना अशा संकट काळात तात्पुरती का होईना, आर्थिक मदत करण्याची मागणी वाजंत्री कलावंतांकडून होत आहे.
फाेटो:
वाजंत्रीचा व्यवसायच दीड वर्षांपासून बंद आहे. प्रामुख्याने चार महिने चालणाऱ्या व्यवसायावरच एक वर्ष कुटुंब चालवावे लागते. एका बँड पथकात किमान ३० लोक असतात. यावरच त्यांच्या घरची चूल पेटते. उपासमारीची वेळ आल्याने शासनाने कलावंत म्हणून मदतीचा हात द्यावा.
-नरेंद्र आमटे,
बँड पथक संचालक, मूर्तिजापूर
गत दीड वर्षापासून वाजंत्री व्यवसाय बंद असल्याने वाजंत्री कलावंत हा आर्थिक संकटात सापडला आहे. या व्यतिरिक्त आमच्याकडे दुसरा जोडधंदा अथवा व्यवसाय नाही. त्यामुळे अनेक कुटुंबे रस्त्यावर आली आहेत. त्यामुळे शासनाने आर्थिक मदत करावी.
- प्रकाश आमटे, संचालक बँड पार्टी, मूर्तिजापूर