ग्रामगीता परीक्षेत पाच हजारांवर विद्यार्थी उत्तीर्ण

ग्रामगीता युगप्रवर्तक ग्रंथाचा अभ्यास

अकोला : शालेय विद्यार्थ्यांना ग्रामगीता युगप्रवर्तक ग्रंथाचा अभ्यास व्हावा, वंदनीय राष्ट्रसंत तुकडोजी महाराज यांचे समग्र वाङ्मय वाचण्यात यावे, विद्यार्थ्यांवर चांगले संस्कार घडावे, याकरिता आयोजित करण्यात आलेल्या ग्रामगीता जीवन विकास परीक्षेत ५३१० विद्यार्थी उत्तीर्ण झाले आहेत. अ.भा. श्री गुरुदेव सेवा मंडळ गुरुकुंज आश्रम अंतर्गत १९९० पासून ग्रामगीता जीवन विकास परीक्षा रामटेके दादांच्या अध्यक्षतेखाली सहा विभागात घेण्यात येते. प्रथम प्रवेश परिचय, प्रवीण, ग्रामनाथ, ग्रामरत्न व ग्राम गीताचार्य या परीक्षा घेऊन पदवीदान केले जाते. आतापर्यंत जिल्ह्यात २०१० ते २०१४ चार वर्षांत ३६०५० विद्यार्थ्यांनी परीक्षा दिली. अकोला जिल्हा श्री गुरुदेव सेवामंडळाचे जिल्हा सेवाधिकारी भानूदास कराळे यांनी शाळा- महाविद्यालयांना परीक्षेसाठी आवाहन केले होते. ८ जून रोजी आयोजित जिल्हा मेळाव्यात प्रथम येणार्‍या विद्यार्थ्यांचा सत्कार करण्यात येईल. यावर्षी नवीन सत्रात २९ विद्यार्थी ग्रामगीताचार्य परीक्षेला बसणार आहेत. श्री गुरुदेव सेवाश्रम या परीक्षा केंद्रातून प्रवीण गटातून डॉ. सु.अ. चेडे ७० गुण घेऊन प्रथम आले. ग्रामनाथ गटातून नीलिमा विजय मोडक ७१ गुण घेऊन प्रथम आल्या. ग्रामरत्न गटातून प्रभावती खरतळकर व ॲड. वंदन कोहाडे ७० गुण घेऊन प्रथम आले. ॲड. रामसिंह राजपूत याच्या हस्ते प्रमाणपत्र उत्तीर्ण विद्यार्थ्यांना वितरित करण्यात आले. कार्यक्रमाच्या अध्यक्षस्थानी काशीराम गावंडे होते. २०१४-१५ च्या सत्रात सर्वांनी सहभागी होऊन परीक्षेकरिता विद्यार्थ्यांना प्रोत्साहित करावे, असे आवाहन भानुदास कराळे, सुधाताई जंजाळ, डॉ. दिलीप कळमकर, प्रा. गायकवाड, रामराव पाटेखेडे, गोवर्धन खवले, जयंतराव इंगोले यांनी केले आहे.