गडकरी आले अन गेले

अकोला पोलिसांची मानवंदना, भाजप पदाधिका-यांच्या स्वागताचा स्वीकार.

अकोला: केंद्रीय भूतल परिवहन व जहाजबांधणी मंत्री नितीन गडकरी गुरुवारी अकोल्याच्या शिवणी विमानतळावर आले आणि पोलिसांची मानवंदना व भाजपा पदाधिकार्‍यांच्या स्वागताचा स्वीकार करून, निघून गेले. केंद्रीय मंत्री गडकरी यांचे गुरुवारी ४.३0 वाजता अकोल्याच्या शिवणी विमानतळावर आगमन झाले. विमानातून उतरल्यानंतर त्यांनी पोलिसांची मानवंदना घेतली. तसेच आ.गोवर्धन शर्मा, आ.रणधीर सावरकर, महापौर उज्ज्वला देशमुख,भाजपचे जिल्हाध्यक्ष तेजराव थोरात, महानगराध्यक्ष डॉ.अशोक ओळंबे पाटील, निवासी उपजिल्हाधिकारी अनिल खंडागळे, सहाय्यक पोलीस अधीक्षक डॉ.प्रवीण मुंढे, तहसीलदार संतोष शिंदे यांनी त्यांचे स्वागत केले. भाजप पदाधिकार्‍यांच्या स्वागताचा स्वीकार करून, लगेच हेलीकॉप्टरने त्यांनी वाशिमकडे प्रयाण केले. वाशिम येथील कार्यक्रम आटोपून सायंकाळी ६ वाजता हेलीकॉप्टरने गडकरी अकोल्याच्या शिवणी विमानतळावर आले. पोलिसांची मानवंदना आणि भाजप पदाधिकार्‍यांच्या स्वागताचा स्वीकार करून, लगेच विमानाने त्यांनी मुंबईकडे प्रयाण केले. त्यामुळे केंद्रीय मंत्री गडकरी अकोल्यात आले आणि निघून गेले, असाच प्रत्यय अकोल्यातील भाजप पदाधिकार्‍यांना आला. यावेळी प्रामुख्याने भाजपचे हरिभाऊ काळे, गोपाल खंडेलवाल, नगरसेवक अजय शर्मा, आशिष पवित्रकार, विजय इंगळे, टोलू जयस्वाल, चेतन शर्मा, प्रशांत अवचार, वसंत खंडेलवाल, श्याम लोहिया आदी पदाधिकारी उपस्थित होते. गडकरी यांच्या आगमनाच्या पृष्ठभूमीवर विमानतळावर केंद्रीय राखीव पोलीस दलाच्या जवानांसह कडक पोलीस बंदोबस्त तैनात करण्यात आला होता.