शौचालय बांधणा-यांना मोफत दळण

बुलडाणा जिल्ह्यातील पांगरखेड ग्रामपंचायतचा आगळा उपक्रम.

डोणगाव(जि. बुलडाणा),दि. २८: गावाच्या स्वच्छेतेचा विडा उचलेल्या अनेक गावातील नागरीकांनी ग्राम स्वच्छेतेसाठी वेगवेगळ्या उपाय योजना आखल्या आहेत, मात्र डोणगाव पासून जवळच असलेल्या ग्रामपंचायत पांगरखेडने स्वच्छ भारत अभियान राबविण्यासाठी व गावाची कर वसूली व्हावी, म्हणून ग्रामपंचायतने स्वत: चक्की खरेदी करुन गावकर्‍यांना मोफत एक वर्ष दळण देण्याचा उपक्रम सुरु केला आहे. ४ सप्टेंबरपासून खा.प्रतापराव जाधव, आ.डॉ.संजय रायमुलकर व सभापती सागर पाटील यांच्या हस्ते सदर मोफत दळणाचा शुभारंभ करण्यात येईल. यासाठी गावकर्‍यांना स्वत:च्या कुटूंब प्रमुखाकडे वैयक्तीक शौचालय असावे व ते वापरात असावे व त्यांनी ग्रामपंचायतची १00 टक्के घर व नळ कर भरलेला असावा. प्रत्येक कुटूंबाला प्रती माणसी ९ किलो प्रतिमाह मोफत दळून मिळेल. विविध प्रसंगीही गावातील दळणही १ रुपया किलोने दळून मिळणार आहे. सदर उपक्रम पांगरखेडच्या सरपंच सौ.अंजलीताई सुर्वे व ग्रा.पं.सदस्य यांनी हिवरेबाजार येथील भेटीनंतर हा उपक्रम सुरू केला. गावातील कर वसुली व शौचालय बांधकाम उद्दीष्ट पूर्ण करण्यासाठी याचा लाभ होईल असे सरपंच अंजली सुर्वे यांनी सांगितले.