दोन गोदामांना आग

मलकापूर येथील आगीत ३७ लाखांचे नुकसान, दहा तासांनंतर आग आटोक्यात.

मलकापूर : राष्ट्रीय महामार्ग क्रमांक ६ वर मलकापूरनजीक दोन गोदामांना अचानक आग लागून ३७ लाख रुपयांचे साहित्य जळून खाक झाले. अग्निशामक दलाने तब्बल दहा तासांच्या परिश्रमानंतर ही आग आटोक्यात आणली. अद्याप या आगीचे नेमके कारण स्पष्ट झाले नाही. मुक्ताईनगर मार्गावर असलेल्या लक्ष्मी फर्निचर व सय्यद अँण्ड ट्रेडिंग कंपनी नामक दोन गोदामांना गुरुवारी पहाटे आग लागली. गब्बूभाई रामलाल देसार व संतोष रामलाल देसार यांच्या मालकीचे हे गोदाम आहेत. येथे व्यवसायाकरिता आणलेले सागवान, निंबाची लाकडे तसेच त्यापासून बनविलेले फर्निचर, दरवाजे, खिडक्या, चौकटी, पलंग, सोफासेट व यंत्रसामग्री असे साहित्य या आगीत जळून खाक झाले. सय्यद जलील सय्यद मुनाफ व त्यांचे बंधू यांच्या गोदामामधील टायर, ट्यूब, प्लास्टिक, लोखंडी वस्तूंचीही मोठय़ा प्रमाणावर हानी झाली असून, बरेचसे साहित्य जळून खाक झाले. नेमक्या कोणत्या कारणामुळे ही आग लागली, ही बाब अद्यापही स्पष्ट झालेली नाही. आगीची माहिती मिळताच पालिकेचे अग्निशामक दलाचे बंब, खासगी टँकर घटनास्थळी बोलावून आग आटोक्यात आणण्याचा प्रयत्न करण्यात आला. आगीची भीषणता पाहता, लक्ष्मी फर्निचरच्या मागील गेटने जेसीबीद्वारे साहित्य हटवून आगीवर नियंत्रण मिळविण्यासाठी प्रयत्न करण्यात आले. दुपारी आगीचे लोळ थांबले; मात्र त्याउपरही धुराचे लोट तेथून सुरूच होते. दुपारी ४ वाजता ही आग पूर्णत: आटोक्यात आली. तहसीलदार रवींद्र जोगी, पोलीस निरीक्षक महेंद्र देशमुख यांनी घटनास्थळाची पाहणी केली. महसूल विभागाच्यावतीने तलाठी मनोज एदलाबादकर यांनी दुपारी घटनास्थळी जाऊन पंचनामा केला. त्यानुसार देसार बंधूंचे २५ लाखांचे, तर सय्यद बंधूंचे १२ लाख रुपयांचे असे एकूण ३७ लाख रुपयांचे नुकसान आगीत झाले.