पातुर: सततची नापिकी व शेतीसाठी घेतलेल्या कर्जाच्या विवंचनेतून ज्या शेतकऱ्यांनी आत्महत्या केली. त्या शेतकरी कुटंबांसाठी नाम फाऊंडेशनने पुढाकार १५ हजारांचा धनादेश देऊन आर्थिक मदत केली.
तालुक्यातील आस्टूल येथील भास्कर त्रंबक इंगळे (४२) या अल्पभूधारक युवा शेतकऱ्याने आत्महत्या केली होती. तसेच सस्ती येथील संदीप हिरामन शेळके या युवा शेतकऱ्याने आत्महत्या केली होती. आत्महत्याग्रस्त शेतकरी कुटुंबाला नाम फाऊंडेशनमार्फत सानुग्रह मदत म्हणून १५ हजार रुपयांचा धनादेश आरती भास्कर इंगळे व वैशाली संदीप शेळके यांना देण्यात आला. नाम फाऊंडेशनचे विदर्भ व खान्देशचे समन्वयक हरीश इथापे यांच्या मार्गदर्शनात जिल्हा समन्वयक माणिक शेळके यांच्या हस्ते देण्यात आली. आतापर्यंत नाम फाउंडेशनने विदर्भ व मराठवाडा या भागात आठ गावे दत्तक घेतली असून, अनेक जिल्ह्यांमध्ये जलसंधारण, तलाव खोलीकरण, नद्यांमधील गाळ उपसणे अशी अनेक समाजोपयोगी कामे लोकसहभागातून केली आहे. आतापर्यंत जिल्ह्यातील ४० शेतकरी आत्महत्याग्रस्त विधवा महिलांना शिलाई मशीनचे वाटप करण्यात आले. २८ कुटुंबांना आर्थिक मदत करण्यात आली. यावेळी नाम फाऊंडेशनचे तालुका समन्वयक मंगेश गोळे, सस्ती येथील प्रतिष्ठित अरविंदजी महाले, अरुण बदरखे, अरविंद शेळके, मुरलीधर बदरखे, संजय शेळके, पवन शेळके आदी उपस्थित होते. (फोटो)