अकोला : पातूर तालुक्यातील भंडारज खुर्द येथे एका ३६ वर्षीय युवकाच्या आत्महत्येचा बनाव केला होता; परंतु मृतकाची पत्नी व पोलिसांच्या सतर्कतेने बनाव उघडकीस आला असून, शवविच्छेदन अहवालात युवकाचा गळा आवळून खून केल्याचे स्पष्ट झाले. याप्रकरणी पातूर पोलिसांनी शुक्रवार, १ सप्टेंबर रोजी खुनाचा गुन्हा दाखल करून दोघा आरोपींना अटक केली.
पातूर तालुक्यातील भंडारज खुर्द येथील मिलिंद तुळशीराम इंगळे (३६) यांनी बुधवार, ३० ऑगस्ट रोजी दुपारी गळफास घेऊन आत्महत्या केल्याची माहिती माहेरी रिसोड येथे गेलेल्या त्यांच्या पत्नीला कळविण्यात आली. मृतकाची पत्नी परतल्यानंतर तिला संशय आला. त्यामुळे तिने पातूर पोलिसांना सोबत घेऊन गाव गाठले. मात्र, ती गावात पोहोचण्याच्या आधीच मृतकावर अंत्यसंस्कार करण्याची तयारी कुटुंब व गावातील लोकांनी केली; परंतु अंत्यसंस्काराच्या वेळेवर बुधवारी सायंकाळी मृतकाची पत्नी पोलिसांना घेऊन पोहोचल्याने अंत्यसंस्कार रोखण्यात आले.
पोलिसांनी मृतदेह ताब्यात घेऊन शवविच्छेदनासाठी पाठविला. शवविच्छेदन अहवालानंतर मिलिंद इंगळे यांनी आत्महत्या केली नसून त्यांना मारहाण करून गळा आवळून खून केला व फासावर लटकवून आत्महत्या केल्याचा बनाव केला, ही बाब स्पष्ट झाली. याप्रकरणी पातूर पोलिसांनी खुनाचा गुन्हा दाखल केला. ही कारवाई ठाणेदार किशोर शेळके, पोलिस उपनिरीक्षक मीरा सोनुने, गजानन मानकर, दिलीप इंगळे, संबोध इंगळे, सत्यजित ठाकूर, नीलेश राठोड यांनी केली.