फोटो : १४०४२०२१-कोल-प्रदीप काळे-पीआय
लोकमत न्यूज नेटवर्क
कोल्हापूर : कामातील हलगर्जीचा अहवाल आणि पोलीस महासंचालकपदासाठी वरिष्ठांनी शिफारस केली नसल्याच्या नैराश्येतून विमानतळ सुरक्षेत असलेल्या पोलीस निरीक्षक प्रदीप शिवाजी काळे (वय ५२, सध्या रा. एनसीसी भवनमागे, कोल्हापूर, मूळ गाव बार्शी, जि. सोलापूर) यांनी ‘आदरणीय सर्वांना नमस्कार आणि जयहिंद. आज मी अनंताच्या प्रवासाला निघालोय’ असा संदेश बुधवारी सकाळी वरिष्ठ अधिकाऱ्यांच्या व्हॉट्सॲप ग्रुपवर पोस्ट करून खळबळ उडवून दिली. पोलिसांनी तातडीने शोधमोहीम राबविली असता, वारणा नदीच्या पुलाजवळ ते नशेत बेशुद्धावस्थेत सापडले. काळे यांनी आत्महत्येचा प्रयत्न केल्याची चर्चा आहे; परंतु पोलीस अधीक्षक शैलेश बलकवडे यांनी मात्र आत्महत्येचा प्रकार नसल्याचे म्हटले आहे.
काळे यांनी बुधवारी सकाळी सहाच्या सुमारास कोल्हापूर परिक्षेत्रातील वरिष्ठ पोलीस अधिकाऱ्यांच्या व्हॉट्सॲप ग्रुपवर वादग्रस्त संदेश पोस्ट केला. ६ वाजून २० मिनिटांच्या सुमारास हा संदेश पोलीस अधीक्षकांनी पाहिला. त्यांनी अपर पोलीस अधीक्षक तिरुपती काकडे, स्थानिक गुन्हे शाखेचे पोलीस निरीक्षक तानाजी सावंत यांच्या नेतृत्वाखाली दोन पथके तयार केली. त्यातील एक पथक काळे यांच्या घरी गेले. तेथे काळे हे तपासासाठी जात असल्याचे सांगून मंगळवारी रात्री दीड वाजता घरातून बाहेर पडल्याचे त्यांच्या पत्नीने सांगितले. त्यांच्याकडून काळे यांचा दुसरा मोबाइल नंबर घेऊन पोलिसांनी त्यांचे लोकेशन शोधले. त्यानुसार काळे हे किणी टोलनाक्याजवळील वारणा नदीच्या पुलाजवळील पायवाटेवर नशेमध्ये बेशुद्धावस्थेत सापडले. त्यांना कसबा बावडा येथील सेवा रुग्णालयात व नंतर खासगी रुग्णालयात नेण्यात आले. त्यांची प्रकृती स्थिर आहे.
................
बलकवडे यांनी सांगितले की, काळे हे पेठवडगाव पोलीस ठाण्यात ऑगस्ट २०१८ ते ऑक्टोबर २०२० या कालावधीत कार्यरत होते. त्यांचा कार्यकाळ पूर्ण झाल्याने त्यांची नियंत्रण कक्षामध्ये बदली करण्यात आली. त्यांच्या जागी पेठवडगाव येथे प्रशिक्षणार्थी पोलीस अधीक्षक धीरजकुमार यांना पदभार देण्यात आला. काळे यांच्या कार्यकाळातील गंभीर स्वरूपाचे सहा गुन्हे प्रलंबित होते. या गुन्ह्याचे दोषारोपपत्र त्यांनी सादर केले नव्हते. त्याबाबत लेखी विचारणा केली. त्यांना म्हणणे सादर करण्यासाठी तीन महिन्यांची मुदतवाढ देण्यात आली. त्यावर अपर पोलीस अधीक्षकांनी काळे यांच्याबाबतचा कामात हलगर्जीचा अहवाल विशेष पोलीस महानिरीक्षकांकडे पाठविला. त्याबाबत आणि पोलीस महासंचालकपद पुरस्कारासाठी शिफारस केली नसल्यावरून काळे यांनी वरिष्ठ अधिकाऱ्यांबाबत या संदेशात नाराजी व्यक्त केली होती.
-----
पोलीस निरीक्षक काळे यांनी संदेशात मांडलेली वस्तुस्थिती नाही. त्यांनी नशेत असताना हा संदेश पाठविला आहे. नाराजी, अडचण मांडण्याची पोलीस दलात विशिष्ट प्रक्रिया, शिस्त आहे. त्याचे पालन काळे यांनी केलेले नाही.
शैलेश बलकवडे,
पोलीस अधीक्षक, कोल्हापूर.