अकोला शहरातून केले अकरा गुन्हेगार तडीपार

सण, उत्सवाच्या पृष्ठभूमीवर पोलिसांची खबरदारी.

अकोला, दि. २८: कावडयात्रा, गणेशोत्सव, पोळा, दुर्गोत्सव, बकरी ईदसारख्या सण, उत्सवांच्या पृष्ठभूमीवर कायदा व सुव्यवस्था अधाबित राखण्यासाठी विविध पोलीस ठाण्यांमध्ये गंभीर स्वरूपाचे गुन्हे दाखल असलेल्या अकरा गुन्हेगारांना शहरातून काही कालावधीसाठी तडीपार करण्याचा आदेश रविवारी उपविभागीय दंडाधिकारी प्रा. संजय खडसे यांनी दिला. तडीपार करण्यात आलेल्या गुन्हेगारांमध्ये सिव्हिल लाइन पोलीस ठाण्यांतर्गत गुन्हेगार सतीश वानखडे, विनोद वामन ठोंबरे, श्रीकांत एकनाथ वैराळे याला सहा महिन्यांसाठी तडीपार करण्यात आले. शुभम प्रभाकर उमाळे याला तीन महिन्यांसाठी, जुने शहर पोलीस ठाण्यांतर्गत येणारा गुन्हेगार अंकुश अरूण केवतकर याला सहा महिन्यांसाठी, रामदासपेठ पोलीस ठाण्यांतर्गत आकाश दारासिंग रोहेल याला तीन महिन्यांसाठी, संतोष ऊर्फ गोट्या रतन गोंडाले याला तीन महिन्यांसाठी, आकोट फैल पोलीस ठाण्यांतर्गत गुन्हेगार एजाज खान मिरबाज खान, सलिम खान अकबर खान याला सहा महिन्यांसाठी आणि खदान पोलीस ठाण्यांतर्गत येणारा गुन्हेगार दस्तगीर खान याकुब खान ऊर्फ डी.के. राजा याला सहा महिन्यांसाठी, डाबकी रोड पोलीस ठाण्यांतर्गत गुन्हेगार शहजाद खान आरीफ खान याला तीन महिन्यांसाठी शहरातून तडीपार करण्याचा आदेश उपविभागीय दंडाधिकारी प्रा. खडसे यांनी दिला आहे.