अकोला, दि. २३- अचानक उच्च दाबाचा विद्युत पुरवठा झाल्याने अनेकांच्या घरातील टीव्ही संच, रेफ्रिजरेटरसह इलेक्ट्रॉनिक साहित्य निकामी झाल्याची घटना स्थानिक गीतानगर, एमरॉल्ड कॉलनी, अकोली भागात शुक्रवारी रात्री ८ वाजताच्या सुमारास घडली. यामुळे या परिसरातील अनेक नागरिकांचे हजारो रुपयांचे नुकसान झाले आहे.महावितरणच्या अकोला ग्रामीण उपविभागांतर्गत येत असलेल्या आकोली, गीतानगर व एमरॉल्ड कॉलनी या भागांत नेहमीच वीज पुरवठय़ाबाबत नानाविध तक्रारी असतात. शुक्रवारी ७.४५ ते ८ वाजताच्या दरम्यान या भागात अचानक वीज पुरवठय़ाचा दाब वाढला. यामुळे अनेकांच्या घरातील इलेक्ट्रॉनिक साहित्यांचे मोठे नुकसान झाले. जवळपास ५0 ते ७0 जणांच्या घरातील टीव्ही संच, रेफ्रिजरेटर व बल्ब अशा वस्तू निकामी झाल्याचे नागरिकांनी सांगितले. यामुळे नागरिकांचे हजारो रुपयांचे नुकसान झाले असून, नुकसान भरपाई देण्याची मागणी नागरिकांकडून होत आहे. यासंदर्भात अकोला ग्रामीणचे कार्यकारी अभियंता देवेंद्र उंबरकर यांच्याशी संपर्क साधला असता, तांत्रिक कारणामुळे विजेचा दाब वाढल्याचे त्यांनी सांगितले. या भागात रिअर्थिंंग करण्यात येईल, असेही त्यांनी सांगितले.
विजेच्या उच्चदाबामुळे टीव्ही, फ्रीज निकामी !
By admin | Updated: September 24, 2016 02:59 IST