आडसूळ फाटा येथे कारवाई,
दहा गॅस सिलिंडर जप्त
अकोला : तेल्हारा पोलीस ठाण्याच्या हद्दीतील आडसूळ फाटा येथे घरगुती गॅस सिलिंडरचा काळाबाजार करणाऱ्या तसेच या गॅस सिलिंडरची जादा दराने विक्री करणाऱ्या एका इसमास पोलीस अधीक्षक जी. श्रीधर यांच्या विशेष पथकाने रविवारी रात्री अटक केली. त्याच्याकडून सुमारे दहा गॅस सिलिंडर जप्त करण्यात आले आहे.
आडसूळ फाटा या गावात तुळशीदास शालिकराम अरबट हा त्याच्या घरामध्ये घरगुती गॅस सिलिंडरचा अवैधरीत्या साठा करून या गॅस सिलिंडरची जास्त दराने विक्री करीत असल्याची माहिती पोलीस अधीक्षक जी. श्रीधर यांच्या विशेष पथकाचे प्रमुख विलास पाटील यांना मिळाली. या माहितीवरून त्यांनी सापळा रचून तुळशीदास अरबट यांच्या घरी छापा टाकला. त्याच्या घरातून दहा घरगुती गॅस सिलिंडर जप्त करण्यात आले आहेत. या गॅस सिलिंडरची तो काळ्याबाजारात विक्री करणार होता, अशी माहिती पोलिसांनी दिली. याप्रकरणी आरोपीविरुद्ध तेलारा पोलीस ठाण्यात गुन्हा दाखल करण्यात आला आहे. त्याच्याकडून सुमारे ५० हजार रुपयांचा मुद्देमाल जप्त करण्यात आला आहे. ही कारवाई पोलीस अधीक्षक जी. श्रीधर, अतिरिक्त पोलीस अधीक्षक मोनिका राऊत यांच्या मार्गदर्शनाखाली विशेष पथकाचे प्रमुख विलास पाटील व त्यांच्या पथकाने केली.