अकोला : कोरोना संसर्गाची दुसरी लाट ओसरत असल्याच्या पृष्ठभूमीवर आतापर्यंत कठोर असलेले निर्बंध सैल झाले असून, सर्वच व्यवहार सुरळीत होत आहेत. हळूहळू जनजीवन पूर्वपदावर येत असताना रेल्वेची प्रवासी वाहतूक मात्र अजूनही पूर्ववत झालेली नाही. कोरोना संसर्गाच्या नावाखाली अजूनही विशेष गाड्या चालविण्यात येत असून, पॅसेंजर गाड्या बंदच ठेवण्यात आल्या आहेत. त्यामुळे केवळ पॅसेंजर गाड्यांमधूनच कोरोनाचा प्रसार होता का, असा सवाल आता सामान्य प्रवाशांकडून उपस्थित केला जात आहे. राज्यात सध्या केवळ विशेष गाड्या धावत असून, या गाड्यांमध्ये केवळ आरक्षण केलेल्यांनाच प्रवास करता येतो. त्यामुळे आरक्षण न मिळालेल्यांची गोची होत आहे. शिवाय आरक्षण तिकीट महाग असल्याने सर्वसामान्यांच्या खिशालाही कात्री लागत आहे. अशा परिस्थितीत पॅसेंजर गाड्या सुरू करण्याची मागणी जनसामान्यांमधून होत आहे.
सध्या सुरू असलेल्या फेस्टिव्हल स्पेशल गाड्या
कुर्ला-हावडा
ओखा-हावडा
पोरबंदर-हावडा
सध्या सुरू असलेल्या विशेष गाड्या
अमरावती-मुंबई
हावडा-अहमदाबाद
नागपूर-पुणे
कोल्हापूर-गोंदिया
नांदेड-श्रीगंगानगर
हापा-बिलासपूर
मग पॅसेंजर बंद का?
भुसावळ-नरखेड
वर्धा-भुसावळ
नागपूर-भुसावळ
अकोला-पूर्णा
अकोला-परळी
एक्स्प्रेसचा प्रवास परवडत नाही
आरक्षित डब्यांमध्ये प्रवासी प्रवास करू शकतात. या डब्यांमध्ये कोरोना प्रतिबंधक नियम पाळले जातातच, हे छातीठोकपणे सांगता येत नाही. मग पॅसेंजर गाड्या का सुरू केल्या जात नाहीत. केवळ या गाड्यांमध्येच कोरोनाचा प्रसार होतो व विशेष गाड्यांमध्ये नाही, असाच अर्थ निघतो. सामान्यांचा विचार करून पॅसेंजर गाड्या सुरू केल्या पाहिजेत.
- मनीष निचळे, गांधीग्राम, जि. अकोला
एक्स्प्रेस व विशेष गाड्यांना छोट्या स्थानकांवर थांबे नाहीत. शिवाय दैनंदिन पास व इतर सवलतींचाही लाभ मिळत नाही. नजीकचा प्रवास करण्यासाठी पॅसेंजर गाड्या उपयुक्त होत्या. आता या गाड्या बंद असल्याने आमच्यासारख्या प्रवाशांची गैरसोय होत आहे. रेल्वेने पॅसेंजर गाड्या सुरू केल्या पाहिजेत.
- गजानन शेंडे, गोपालखेड, जि. अकोला