गंगानगरातील रस्त्यांची दुरवस्था
अकोला : शहरातून जाणाऱ्या राष्ट्रीय महामार्गाला लागून असलेल्या गंगानगर भागातील रस्त्यांची दुरवस्था झाली आहे. रस्त्यावर खड्डे आणि धुळीमुळे परिसरातील नागरिक त्रस्त झाले आहे. याकडे स्थानिक नगरसेवकांचे दुर्लक्ष असून, त्यांनी नागरिकांच्या समस्येकडे लक्ष द्यावे, अशी मागणी परिसरातील नागरिकांकडून करण्यात येत आहे.
सांस्कृतिक भवनाचे काम रखडले
अकाेला : शहरातील रामदासपेठ परिसरात सांस्कृतिक भवनाच्या इमारतीची निर्मिती करण्यात आली आहे. इमारतीचे बांधकाम जवळपास पूर्ण झाले असून, आणखी काही काम पूर्णत्वास येणे बाकी आहे. निधीचा अभाव असल्याने काम रखडल्याची माहिती क्रीडा विभागातील कर्मचाऱ्यांनी दिली. दुसरीकडे मात्र, क्रीडाप्रेमींना सांस्कृतिक भवनाची प्रतीक्षा आहे.
जिल्हा स्री रुग्णालयात अस्वच्छता
अकोला : कोरोनाच्या पार्श्वभूमीवर जिल्हा स्री रुग्णालयातील वॉर्डमध्ये स्वच्छतेची विशेष खबरदारी घेतली जात असली, तरी रुग्णालय परिसरात मोठ्या प्रमाणात अस्वच्छता पसरल्याचे दिसून येत आहे. रुग्णालयाच्या मागच्या बाजूला स्वच्छतागृहाजवळ सर्वसाधारण कचऱ्यासोबतच रुग्णालयातील कचराही टाकण्यात येत असल्याचे चित्र दिसून येत आहे.