अज्ञात व्यक्तीने जिल्हाधिकारी जितेंद्र पापळकर यांच्या नावाचे बनावट फेसबुक अकाउंट उघडले असून, या अकाउंटवरून मॅसेंजरद्वारे अनेकांना पैशांची मागणी झाली. माजी महापौर अश्विनी हातवळणे यांचे पुत्र अखिलेश हातवळणे यांना शुक्रवारी रात्री पापळकर यांच्या बनावट अकाउंटवरून मेसेज गेल्यानंतर हा प्रकार उघडकीस आला. हॅकरने हातवळणे यांना तातडीने १२ हजार रुपयांची आवश्यकता असल्याचे सांगून, ऑनलाइन पैसे खात्यात वळते करण्याची विनंती केली. काहीतरी गौडबंगाल असल्याचे लक्षात येताच, अखिलेश हातवळणे यांनी याबाबत जिल्हाधिकारी पापळकर यांना माहिती दिली. याबाबत सायबर सेलकडे तक्रार करण्यात आली असून, पोलीस तपास करीत आहेत.
अनेकांना पाठविल्या ‘फ्रेंड रिक्वेस्ट’
फेसबुकवर अकोल्याचे जिल्हाधिकारी जितेंद्र पापळकर यांच्या ‘Jitendra Papalkar’ या नावाने फेसबुक अकाउंट आहे. याच नावाने हॅकर्सनी बनावट अकाउंट तयार केले. काल संध्याकाळनंतर अकोल्यातील काही प्रतिष्ठित मंडळींना या बनावट अकाउंटवरून ‘फ्रेंड रिक्वेस्ट’ पाठविण्यात आल्या. ज्येष्ठ पत्रकार प्रा. सुभाष गादिया, अकोल्याच्या माजी महापौर अश्विनी हातवळणे यांचा मुलगा अखिलेश यांच्यासह १२ ते १३ जणांना अशा रिक्वेस्ट पाठविण्यात आल्या आहेत. या फ्रेंड रिक्वेस्ट स्वीकारल्यानंतर या अकाउंटवरून मराठीत चॅटिंग सुरू करण्यात आले. आपण सध्या हॉस्पिटलमध्ये भरती असून, आपल्याला अतिशय तातडीने १२ हजार रुपयांची आवश्यकता आहे, हे पैसे लवकरच परत करणार असल्याचे या चॅटिंगमध्ये म्हटले गेले. हा फसवणुकीचा प्रकार असल्याचे सर्वांच्याच लक्षात आल्याने कुणीच पैशांच्या मागणीला प्रतिसाद दिला नाही.
धागेदोरे राजस्थानपर्यंत
या संपूर्ण प्रकरणाची तक्रार जिल्हाधिकारी जितेंद्र पापळकर यांनी सिव्हिल लाइन्स पोलिसांकडे केली. सिव्हिल लाइन्स पोलिसांनी या प्रकरणाचा तपास अकोला पोलिसांच्या सायबर शाखेकडे सोपविला आहे. बनावट अकाउंट तयार करणाऱ्या हॅकर्सनी यासंदर्भात चॅटिंग करताना ‘गुगल पे’ आणि ‘पेटीएम’चे अकाउंट नंबर दिले आहेत. यात ‘गुगल पे’साठी 9728937247 हा क्रमांक देण्यात आला आहे, तर ‘पेटीएम’ अकाउंटसाठी 918059934406 हा क्रमांक देण्यात आला असून, त्यासाठी ‘आयएफएससी कोड’ 0123456 हा देण्यात आला आहे. हे दोन्ही क्रमांक राजस्थानमधील बाडमेर जिल्ह्यातून संचालित होत असल्याचे पोलीस तपासात समोर आले आहे.