खेट्री: पातूर तालुक्यातील चांगेफळ शिवारातील अल्पभूधारक शेतकरी शेख आसीम यांच्या शेतातील तीन एकरावरील कपाशी पिकाचे अज्ञात रोगामुळे नुकसान झाले आहे. याबाबत शेतकरी शेख आसीम यांनी वारंवार कृषी विभागाशी संपर्क साधला असता, कृषी विभागाच्या अधिकाऱ्यांनी आठवडाभरानंतर बुधवारी शेतात पाहणी केली; मात्र पंचनामा न करता शेतात उभे राहून फक्त फोटो काढण्यात आल्याचा आरोप शेतकरी शेख आसीम यांनी केला आहे.
शिरपूर येथील रहिवासी शेख आसीम व नासेहा अंजुम यांची चांगेफळ शिवारात सामूहिक क्षेत्र सर्व्हे नंबर ४८/ १ , एक हेक्टर ६२ आर. अशा तीन एकरात कपाशी पिकाची पेरणी केली होती, परंतु गेल्या आठवडाभरापूर्वी अज्ञात रोगामुळे तीन एकरातील कपाशी पिकाचे नुकसान झाले आहे. तीन एकरातील कपाशी पेरणीसाठी आतापर्यंत जवळपास ७० ते ८० हजार रुपये खर्च लावला; मात्र खर्च पाण्यात गेला आहे. याबाबत शेतकरी शेख आसीम यांनी कृषी विभागाशी संपर्क केल्यानंतर आठवडाभराने कृषी विभागाच्या अधिकाऱ्यांनी शेतात धडक दिली. सर्वेक्षण करून आर्थिक मदत देण्याची मागणी शेतकऱ्यांकडून होत आहे.
-----------------
कपाशी पिकाची पाहणी करण्यात आली असून, पिकावर तणनाशक फवारणी केली आहे, तसेच पंचनामा करून अहवाल वरिष्ठांकडे सादर करण्यात येईल.
- धनंजय शेटे, तालुका कृषी अधिकारी, पातूर
-------------------------
गेल्या आठ दिवसांपासून तीन एकरातील कपाशी पिकावर रोग आल्यामुळे नुकसान झाले आहे. याबाबत कृषी विभागाशी वारंवार संपर्क केला; परंतु आठ दिवसांनंतर पंचनामा करणे अपेक्षित असताना थातूरमातूर पाहणी करून फोटो काढण्यात आले.
- शेख आसीम, शेतकरी, चांगेफळ
080921\img-20210908-wa0143_1.jpg
फोटो