तेल्हारा : कोरोना चाचणीकरिता नागरिक प्राथमिक आरोग्य केंद्र, ग्रामीण रुग्णालय, शासकीय वैद्यकीय महाविद्यालय येथे धाव घेऊन चाचणी करतात. त्यावेळी तेथे मोठी गर्दी होत आहे. चाचणीचा अहवाल पॉझिटिव्ह आहे की निगेटिव्ह आहे, हे पाहण्यासाठीसुद्धा चाचणीच्या ठिकाणी मोठी गर्दी होत आहे. ही गर्दी काेरोनास निमंत्रण देणारी ठरत असल्याने, कोरोना चाचणीचा अहवाल व्हॉट्सॲप, ई-मेलवर देण्याची मागणी नागरिकांनी केली आहे.
कोरोना चाचणी अहवाल मोबाईल, व्हॉट्सॲप, ईमेलवर मिळाल्यास, चाचणी अहवाल देणाऱ्या केंद्रांवर नागरिकांची गर्दी होणार नाही. त्यामुळे कोरोनाच्या बचावापासून रक्षणही करता येईल. व्यक्तीच्या मोबाईल नंबरवर मेसेजद्वारा कळविल्यास गर्दी टाळल्या जाईल आणि कोरोनाचा प्रादुर्भाव रोखण्यास मदत होईल, अशी मागणी नागरिकांनी केली आहे. शासन कोरोनाचा प्रादुर्भाव रोखण्यासाठी युद्ध पातळीवर प्रयत्न करीत आहे. यामध्ये प्रामुख्याने कोरोना चाचणीवर भर दिला जात आहे. मात्र चाचणीकरिता नागरिकांना जवळच्या केंद्रावर जावे लागत असल्याने प्राथमिक आरोग्य केंद्र, ग्रामीण रुग्णालय, शासकीय मेडिकल कॉलेज या ठिकाणी अगोदरच रुग्ण व त्यांच्या नातेवाईकांची गर्दी असते आणि तेथेच चाचणी रिपोर्ट घेण्यासाठी अनेकदा झुंबड उडते.
एकीकडे शासन गर्दी टाळण्यासाठी कडक लॉकडाऊन लागू करीत असताना, दुसरीकडे कोरोना विषाणूच्या प्रसाराचे चाचणी अहवाल देणारे केंद्र होऊ नये यासाठी शासनाने चाचणी केल्यानंतर नागरिकांच्या मोबाईलवर संदेश दिला जातो. त्याचप्रमाणे त्या नागरिकांचा टेस्टिंग रिपोर्टसुध्दा मोबाईलवर दिल्यास गर्दी कमी होईल व नागरिकांना त्रास होणार नाही. शासकीय यंत्रणेवरील ताण कमी होईल.
चाचणी केल्यानंतर नागरिकांनी दिलेल्या मोबाईलवर संदेश दिल्या जातो. मात्र त्याचा अहवाल देण्याची सुविधा सिस्टिममध्ये नाही. परंतु नागरिकांना मोबाईलवर अहवाल देता येईल का, याकरिता प्रयत्न करू.
-प्रा. संजय खडसे,
निवासी उपजिल्हाधिकारी