कोरोनाकाळात आईवडिलांचे छत्र हरविलेल्या बाळापूर तालुक्यातील दहा मुलांच्या पालनपोषणाची मोठी जबाबदारी घेणारे मुरलीधर राऊत यांच्या कार्याची दखल घेऊन त्यांच्या मित्रांनी एक कार्यक्रम घेत, सन्मानपूर्वक या मुलांना एक हजार रुपयांचा धनादेश दिला. पारस फाट्यावरील त्यांचे हॉटेल वेगवेगळ्या उपक्रमांनी नेहमीच चर्चेत असते. पंतप्रधान नरेंद्र मोदी यांनीसुद्धा ‘मन की बात’मधून त्यांच्या उपक्रमाचे कौतुक केले होते. मागील वर्षी लॉकडाऊन काळात मुरलीधर राऊत यांनी परराज्यात पायी जाणाऱ्यांना मोफत पोटभर जेवण दिले. त्यानंतर अनाथ मुलांसह आत्महत्याग्रस्त शेतकरी कुटुंबातील मुलींचे स्वखर्चाने लग्न लावून सामाजिक बांधिलकी जपली. मुरलीधर राऊत यांनी सामाजिक दायित्व समजून आपलेही समाजाला काही देणे आहे, ही जाण ठेवली. कोरोनामुळे आई-वडील गमावलेल्या मुलांच्या मदतीसाठी ते समोर आले आहेत. त्यांचे कार्य पाहून, सेवानिवृत्त पोलीस अधीक्षक पी.टी. पाटील, मनोहर बचाटे यांनीसुद्धा दोन मुलांना २० वर्षांसाठी दत्तक घेत, त्यांच्या पालनपोषणाची जबाबदारी स्वीकारली आहे.
फोटो:
यांच्या उपस्थितीत स्वीकारली जबाबदारी
शेळद फाटा बाळापूर येथे गुरुवारी झालेल्या कार्यक्रमात प्रदेश काँग्रेस पक्षाचे प्रवक्ते डॉ. सुधीर ढोणे, बाळापूर तालुका खरेदी-विक्री संघाचे उपाध्यक्ष किशोरचंद्र गुजराथी, बाळापूर कृषी उत्पन्न बाजार समितीचे सभापती सेवकाराम ताथोड, राष्ट्रसंत तुकडोजी महाराज सेवाश्रम मोझरीचे सदस्य भानुदास कराळे, टिकार महाराज, विदर्भ मुख्याध्यापक संघाचे माजी अध्यक्ष भाऊसाहेब शिंदे, शिवसंग्रामचे प्रदेश उपाध्यक्ष संदीप पाटील, बँकेचे संचालक राजेश पाटील राऊत, शेळदचे सरपंच सागर उपर्वट, पत्रकार रमेेश ठाकरे, राजेश दिवनाले, गुलाबराव हागे पाटील यांच्या उपस्थितीत मुरलीधर राऊत, मनोहर बचाटे, पी.टी. पाटील यांनी दहा मुलांच्या पालनपोषणासह शैक्षणिक खर्चाची जबाबदारी स्वीकारली.
यांचा एक पाल्य दत्तक घेण्याचा संकल्प
मुरलीधर राऊत यांच्या उपक्रमाचे कौतुक होत असून, गोरगरीब व संकटग्रस्त शेतकऱ्यांच्या मदतीला धावून जाण्यासाठी पुढील आयुष्य खर्ची घालण्याचा संकल्प केला असल्याचे मुरलीधर राऊत यांनी सांगितले. राऊत यांच्या उपक्रमात प्रत्येकी एक पाल्य दत्तक घेण्याचा संकल्प पंचायत समितीचे माजी सदस्य मनोहरराव बचाटे व सेवानिवृत्त पोलीस अधीक्षक पी.टी. पाटील यांनी जाहीर केला.