अकोला : ज्येष्ठ नागरिकांसाठी दिल्या जाणाऱ्या लसीचा मागील तीन दिवसांपासून तुटवडा निर्माण झाला होता. गुरुवारी महापालिकेच्या लसीकरण केंद्रांमध्ये लस उपलब्ध होताच ती घेण्यासाठी ज्येष्ठ नागरिकांनी एकच गर्दी केली. त्यामुळे मनपाच्या आरोग्य विभागाचे नियोजन कोलमडल्याने लसीकरण केंद्रांमध्ये गोंधळाची स्थिती निर्माण झाली होती. या प्रकाराची माहिती मिळताच मनपा आयुक्त निमा अरोरा यांनी तातडीने लसीकरण केंद्रांची पाहणी केली.
जीवघेण्या कोरोना विषाणूची लागण होऊन बाधित रुग्णांची संख्या झपाट्याने वाढत चालली आहे. जिल्हा सामान्य रुग्णालय असो वा शहरातील खासगी रुग्णालयांमध्ये खाटांची कमतरता निर्माण झाली आहे. एकूणच परिस्थितीचे गांभीर्य लक्षात घेता अकोलेकरांनी आता लस घेण्यासाठी धावाधाव सुरू केली आहे. यादरम्यान मध्यंतरी ज्येष्ठ नागरिकांसाठी लस उपलब्ध नसल्यामुळे महापालिकेची चार लसीकरण केंद्रे बंद झाली होती. गुरुवारी ज्येष्ठ नागरिकांसाठी उपलब्ध होताच महापालिकेच्या लसीकरण केंद्रांमध्ये नागरिकांनी एकच गर्दी केल्याचे दिसून आले. या वेळी लस घेण्यासाठी आलेल्या नागरिकांना रांगेमध्ये ताटकळत उभे राहावे लागल्यामुळे लसीकरण केंद्रांमध्ये काही काळ गोंधळाची परिस्थिती निर्माण झाली होती. नागरिकांनी महापालिकेच्या नियोजनशून्य कारभाराबद्दल तीव्र नाराजी व्यक्त केली. या प्रकाराची माहिती मिळताच मनपा आयुक्त निमा अरोरा यांनी मनपाच्या अखत्यारीत असलेल्या सर्व लसीकरण केंद्रांची तातडीने पाहणी केली.
उन्हामुळे ज्येष्ठ नागरिकांची दमछाक
महापालिकेच्या अखत्यारीत असलेल्या लसीकरण केंद्रांमध्ये ज्येष्ठ नागरिकांना पिण्यासाठी पाणी व बसण्यासाठी व्यवस्था उपलब्ध नसल्याचे चित्र दिसून येते. यामध्ये भरतिया रुग्णालयाचा अपवाद वगळल्यास इतर ठिकाणी ज्येष्ठ नागरिकांना बसण्याची व्यवस्था नसून भर उन्हात ताटकळत उभे राहावे लागत आहे. उन्हाच्या तीव्रतेमुळे ज्येष्ठ नागरिकांची दमछाक होत असून या प्रकाराची मनपा आयुक्त निमा अरोरा यांनी तातडीने दखल घेणे गरजेचे झाले आहे.
निमा अरोरा पोहोचल्या थेट शवविच्छेदन कक्षात!
जिल्हा सामान्य रुग्णालयाच्या आवारात मनपाच्या वतीने लसीकरण केंद्र उघडण्यात आले आहे. या ठिकाणी पाहणी करण्यासाठी गेलेल्या आयुक्त निमा अरोरा यांनी अचानक शवविच्छेदन कक्षात धाव घेतली. या वेळी कोरोनाबाधित मृतदेहांवर अंत्यसंस्कार करण्याची जबाबदारी सोपविलेले मनपाचे स्वच्छता व आरोग्य विभागप्रमुख प्रशांत राजूरकर तसेच मृतदेहांवर अंत्यसंस्कार करणारे कच्ची मेमन जमातीचे पदाधिकारी जावेद जकेरीया यांच्याकडून कामकाजाची माहिती घेतली.