अकोला : संत गजानन महाराज मंदिर शेगावचे विश्वस्त, कर्मयोगी शिवशंकरभाऊ पाटील यांच्या सामुदायिक श्रद्धांजली कार्यक्रमाने संत नगरी अवतरल्याची अनुभूती अकोल्यातील आदर्श कॉलनी, आदर्श पार्क येथे श्री. गजानन भक्तांनी घेतली.
संत गजानन महाराज पालखी सोहळा समिती दरवर्षी शेगाव ते पंढरपूर जाणाऱ्या श्री संत गजानन महाराज यांच्या पालखीचे स्वागत करून भाविकांसाठी दर्शन व्यवस्था व महाप्रसादाचे वितरण करीत असते. दरवर्षी होणारा अत्यंत दिमाखदार असा हा धार्मिक सोहळा कोरोनामुळे बंद आहे. पालखी सोहळा समितीला वेळोवेळी मार्गदर्शन करणारे संत गजानन महाराज शेगावचे विश्वस्त शिवशंकरभाऊ पाटील यांच्या निधनाने पालखी सोहळा समिती व भाविकांनी सामुदायिक श्रद्धांजली कार्यक्रम आदर्श पार्क परिसरात गुरुवारी आयोजित केला होता. ह्या कार्यक्रमात गजानन महाराजांची महाआरती भजन संध्या तसेच महाप्रसादाचे वितरण करण्यात आले. यावेळी उपस्थित भाविक भक्तांनी मौन श्रद्धांजली व पुष्पांजली अर्पण करून अभिवादन केले.
गुरुदेव भजन मंडळ सांगवी खुर्द च्या महिला व पुरुष भक्तांनी श्री. गजानन महाराज आरती व सुरेल धार्मिक भजने गायली़ उपस्थित सर्व भजनी मंडळींना पालखी सोहळा समितीच्या वतीने नारळ, शेला टोपी देऊन नमन केले. सामुदायिक श्रद्धांजली कार्यक्रम व भजन सोहळा यशस्वीतेसाठी संत गजानन महाराज पालखी सोहळा समिती आदर्श कॉलनी, आदर्श पार्कच्या सर्व सदस्य गजानन भक्तांनी पुढाकार घेतला.