शीतपेयाच्या बाटलीत मृत साप!

वाशिम जिल्ह्यातील मेडशी येथील घटना.

मेडशी (वाशिम) : जिल्ह्यातील मेडशी येथे विनर कंपनीच्या शीतपेयात रविवारी चक्क मृत साप आढळला. मेडशी येथील चंद्रकांत घुगे हे शीतपेय पिण्याकरिता गावातीलच एका दुकानात गेले. त्यांनी विनर कंपनीच्या शीतपेयाची मागणी दुकानदारास मागणी केली. दुकानदाराने फ्रीजमधून बाटली बाहेर काढताच, त्यामध्ये दोरीसारखी वस्तू असल्याचे निदर्शनास पडले. बारकाईने पाहिले असता, बाटलीमध्ये जवळपास एक फूट लांबीचे सापाचे मृत पिल्लू आढळले. बाटलीतील द्रव्य काळय़ा रंगाचे असल्यामुळे सापाचे पिल्लू लगेच दिसले नाही; मात्र निरखून बघितल्यावर ते दिसून आले. ही वार्ता गावात पसरून नागरिकांनी गर्दी केली. बाटलीची पॅकिंग मार्च २0१६ मध्ये गजानन बॉटलिंग, चिखली, जिल्हा बुलडाणा येथे करण्यात आली आहे. याप्रकरणी पातूर येथील विनर कंपनीचे एजन्ट नितीन भटकर यांच्याशी संपर्क साधला असता, त्यांनी मूळ एजन्ट व मालक प्रताप देशमुख यांच्याकडून बाटल्या आणल्याचे सांगितले. मात्र शीतपेय कंपनीचे मालक प्रतापराव जाधव यांनी शीतपेयाच्या बाटलीत साप जाणे शक्यच नसल्याचे सांगून व्यावसायिक स्पर्धकांनी माझ्याविरुद्ध केलेले हे षड्यंत्र असल्याचे त्यांनी स्पष्ट केले.