अकोला : रामदास पेठ पोलीस ठाण्याच्या हद्दीतील मोहता मिलरोडवर एका किराणा दुकानातून गांजाची मोठ्या प्रमाणात विक्री होत असल्याच्या माहितीवरून शहर पोलीस उपअधीक्षक यांच्या विशेष पथकाने शनिवारी रात्री छापा टाकून गांजा जप्त केला. या ठिकाणावरून किराणा दुकानदारास ताब्यात घेण्यात आले आहे.
मोहता मिलरोडवरील मुसा कॉलनी येथील फैजान किराणा शॉप या दुकानातून अमली पदार्थांची विक्री करण्यात येत असल्याची माहिती शहर पोलीस उपअधीक्षक सचिन कदम यांच्या विशेष पथकाला मिळाली. या माहितीवरून त्यांच्या विशेष पथकाने पाळत ठेवून किराणा दुकानाचा मालक राजीक खान लतीफ खान वय २० वर्ष राहणार मोहता मिल चाळ रोड यास ताब्यात घेतले. त्याच्याकडून किराणा दुकानातील एक किलो २०० ग्राम गांजा जप्त करण्यात आला आहे. अकोला शहरात तसेच ग्रामीण भागात मोठ्या प्रमाणात गांजा विक्री होत असल्याचे यावरून पुन्हा एकदा स्पष्ट झाले आहे. याप्रकरणी रामदासपेठ पोलीस ठाण्यात आरोपी राजीक खान लतीफ खान यांच्याविरुद्ध एनडीपीएस ॲक्ट अन्वये गुन्हा दाखल करण्यात आला आहे. ही कारवाई विशेष पथकाचे महेन्द्र बहादुरकर, विनय जाधव, राज चंदेल, हरणे मेजर यांनी केली.