उद्योजक जयंत पडगीलवार यांचा मुलगा बेपत्ता

प्रसिद्ध उद्योजक जयंत पडगीलवार यांचा मुलगा सुयश हा मंगळवारपासून बेपत्ता झाला.

अकोला: प्रसिद्ध उद्योजक जयंत पडगीलवार यांचा मुलगा सुयश हा मंगळवारपासून बेपत्ता झाला. तो बेपत्ता झाल्याची नोंद रामदासपेठ पोलिसांनी मंगळवारी उशिरा रात्री केली असून, त्याचा पोलीस शोध घेत आहेत. या घटनेमुळे खळबळ उडाली आहे. जयंत पडगीलवार यांचा मुलगा सुयश (३0) हा एमआयडीसीतील उद्योग सांभाळतो. दोन वर्षांपूर्वीच सुयशचे लग्न झाले. मंगळवारी सुयश नेहमीप्रमाणे त्याच्या एमएच ३0 पी ३३३८ क्रमांकाच्या कारने एमआयडीसीमध्ये गेला. दुपारी त्याचे वडील जयंत पडगीलवार यांच्यासोबत बोलणेही झाले. त्यानंतर दुपारी सुयश हा एमआयडीसीतील त्यांच्या इंडस्ट्रिजमधून बाहेर पडला; परंतु घरी पोहोचला नाही. त्याचा मोबाइलही बंद असल्याचे दिसून आले. सुयश अचानक गायब झाल्याने, तो कुठे गेला असावा, याबाबत कुटुंबीय चिंतेत पडले. सुयशचा त्यांनी सर्वत्र शोध सुरू केला. मित्रमंडळींसह नातेवाईकांकडेसुद्धा चौकशी केली; परंतु सुयशचा ठावठिकाणा लागला नाही. निदान रात्री तरी सुयश घरी परतेल, अशी त्याच्या कुटुंबीयांना आशा होती; परंतु रात्री उशिरापर्यंत सुयश घरी परतला नाही. त्यामुळे चिंताग्रस्त कुटुंबीयांनी रात्री उशिरा रामदासपेठ पोलीस ठाण्यात तक्रार दिली. पोलीस त्याच्या मोबाईलचे लोकेशन शोधत आहेत.