महायुतीच्या घटकपक्षांची भाजपालाच डोकेदुखी

पश्‍चिम विदर्भ : शिवसंग्राम व स्वाभिमानीला हवे भाजपाचे मतदारसंघ

बुलडाणा: लोकसभा निवडणुकीच्यापूर्वी भाजप-शिवसेना या दोन पक्षांच्या युतीमध्ये काही घटक पक्षांचा समावेश झाला आणि या युतीची महायुती झाली. महायुतीतील घटक पक्षांना सांभाळून घेण्याची जबाबदारी भाजपा आणि सेना या दोन्ही पक्षांची असली तरी, प्रत्यक्षात मात्र या घटक पक्षांनी विधानसभा मतदारसंघावर केलेल्या दाव्यांमुळे भाजपाचीच डोकेदुखी जास्त वाढली आहे. पश्‍चिम विदर्भातील तीन मतदारसंघांवर शिवसंग्राम व स्वाभिमानी शेतकरी संघटनेने दावा केला असून, विशेष म्हणजे हे तीनही मतदारसंघ महायुतीमध्ये भाजपच्या वाट्याचे आहेत. पश्‍चिम विदर्भातून सर्वाधिक आमदार देणार्‍या बुलडाणा जिल्ह्यातील सात मतदार संघांपैकी तीन मतदारसंघ भाजपकडे, तर चार सेनेकडे आहेत. खामगाव, चिखली, जळगाव व मलकापूर या तीन मतदारसंघांमध्ये भाजपने वर्चस्व कायम ठेवले आहे. चिखली व खामगाव या मतदारसंघात गतवेळी भाजपला यश मिळविता आले नाही. त्यापैकी चिखली मतदारसंघात २00९ मध्ये आमदार असलेल्या रेखाताई खेडेकर यांचे तिकीट कापून ऐनवेळी प्रकाशबुवा जवंजाळ यांना उमेदवारी देण्यात आली. त्यामुळे येथे भाजपचा पराभव झाला. खामगावमध्ये सलग तीन वेळा भाजपाचा पराभव होत आहे. या दोन मतदारसंघांपैकी चिखली मतदारसंघावर स्वाभिमानी शेतकरी संघटनेने दावा केला आहे. महायुतीच्या कोट्यातून स्वाभिमानीला चिखली हा मतदारसंघ हवा असून, तशी जय्यत तयारी स्वाभिमानीने केली आहे. महायुती तुटली तरी चालेल; पण चिखली घेऊ, अशी निर्वाणीची भाषा स्वाभिमानीचे खा. राजू शेट्टी यांनी येथील मेळाव्यात वापरली होती. या पृष्ठभूमीवर चिखलीतील भाजप वतरुळात अस्वस्थता आहे. भाजपकडे दावेदारांची मोठी यादी असून, स्वाभिमानीच्या दाव्यामुळे हे सर्वच दावेदार आपआपल्या गॉडफादरकडे ह्यलॉबिंगह्ण करताना दिसत आहे. ** अकोला जिल्ह्यातील बाळापूरसाठी प्रयत्नअकोला जिल्ह्यात पाच विधानसभा मतदारसंघ असून, त्यापैकी अकोला पूर्व व आकोट हे शिवसेनेकडे, तर बाळापूर, अकोला पश्‍चिम आणि मूर्तिजापूर हे तीन मतदारसंघ भाजपकडे आहेत. या तीन मतदारसंघांपैकी बाळापूर मतदारसंघावर शिवसंग्राम संघटनेने दावा केला आहे. शिवसंग्रामचे नेते विनायकराव मेटे यांनी पश्‍चिम विदर्भात दोन जागा आम्ही लढवणार, अशी माहिती बुलडाण्यातील पत्रकार परिषदेत दिली होती. त्यामुळे महायुतीचा घटकपक्ष असलेल्या शिवसंग्रामच्या अपेक्षांचेही ओझे भाजपावरच पडले आहे.** वाशिममध्ये रिसोडवर दावावाशिम जिल्ह्यात तीन विधानसभा मतदारसंघ असून, जागा वाटपात त्यापैकी भाजपला दोन व शिवसेनेला एक मतदारसंघ मिळाला आहे. भाजपकडे असलेल्या दोन मतदारसंघांपैकी रिसोड मतदारसंघावर शिवसंग्रामने आपला हक्क सांगितला आहे. शिवसंग्रामचे नेते विनायकराव मेटे हे स्वत:च रिसोड या मतदारसंघातून इच्छुक असल्याचे सांगितले जाते.