अकोला : दूध उत्पादनात भारत जागतिक स्तरावर अव्वल क्रमांक असला तरी गुणवत्तापूर्ण दूध उत्पादनाची निर्मिती क्षमता वाढविण्यासाठी पशुविज्ञान क्षेत्रात पैदास व्यवस्थापनासह जैव तंत्रज्ञान आवश्यक असल्याचे मत राष्ट्रीय दूध संशोधन केंद्राचे निदेशक तथा कुलगुरू डॉ. एम. एस. चौहान यांनी व्यक्त केले. महाराष्ट्र पशु व मत्स्य विज्ञान विद्यापीठ अंतर्गत स्नातकोत्तर पशुवैद्यक व पशुविज्ञान संस्था, अकोला यांचे वतीने दिनांक २ ते ६ फेब्रुवारी २०२१ दरम्यान आयोजित "दुधाळ पशूंमध्ये प्रजनन क्षमता वृद्धिंगत करण्यासाठी अत्याधुनिक जैव तंत्रज्ञान" या संकल्पनेवर आधारित पाच दिवसीय आंतरराष्ट्रीय प्रशिक्षणाच्या उद्घाटन प्रसंगी बोलत होते.दुध उत्पादन वाढीसाठी व शाश्वत दुध व्यवसायासाठी कालवडीचा वयात येण्याचा कालावधी तसेच दोन वितातील अंतर कमी करण्या बरोबर जनावर विण्याच्या सुमारास उत्तम आरोग्य व्यवस्थापन करणे गरजेचे असल्याचे कार्यक्रमाचे अध्यक्ष तथा संस्थेचे सहयोगी अधिष्ठाता प्रा. डॉ. अनिल भिकाने यानी अधोरेखीत केले. प्रशिक्षण समारोप प्रसंगी प्रा डॉ माणिक तांदळे, अधिष्ठाता, कर्नाटक पशुवैदयकीय विद्यापीठ, बिदर व प्रा डॉ नितीन कुरकुरे, संशोधन संचालक , माफसू नागपूर हे प्रमुख पाहूणे म्हणून उपस्थित होते. प्रशिक्षण समन्वयक डॉ. महेश इंगवले यांनी प्रास्ताविकात प्रशिक्षण आयोजना मागील भूमीका स्पष्ट केली. तर प्रा डॉ चैतन्य पावशे यानी मान्यवरांसह प्रशिक्षणात सहभागी झालेल्या विविध राज्यातील एकूण २४० विद्यार्थी, पशुवैद्यकीय अधिकारी, संशोधक आदींचे स्वागत केले.
सदर प्रशिक्षणात प्रा डॉ. मो.अमीन बेग (सौदी अरेबिया), डॉ. संजीव चौबळ (अमेरिका), डॉ पांडूरंग नेटके (ऑस्ट्रेलिया), डॉ. कुमरेसन (बंगळुरू), डॉ. होनपारखे (पंजाब), डॉ. सुनील जाधव (बरेली), डॉ. बी.एन.सुतार (गुजरात), डॉ. एस. संतोष कुमार, डॉ सेल्वराजू (तामिळनाडू),डॉ. मुरुगवेल (पाँडिचेरी),डॉ. टि.के. मोहंती ( हरियाना), डॉ. प्रदीप महाजन आणि डॉ. जयंत खडसे (पुणे) आदी व्याख्यात्यांनी पशुप्रजनन क्षेत्रातील अत्याधुनिक तंत्रज्ञान संबंधी विविध विषयावर प्रशिक्षणार्थ्यांना मार्गदर्शन केले.
संचालन डॉ. प्रवीण बनकर तर आभार प्रदर्शन डॉ. श्याम देशमुख यांनी केले. प्रशिक्षणाच्या यशस्वीतेसाठी प्रा. डॉ. सुनील वाघमारे, डॉ. रत्नाकर राऊळकर यांनी तर तांत्रिक सहकार्य नॉलेज पार्टनर असलेल्या आलेम्बिक फार्माचे पी. करुणानिथी, डॉ. संतोष शिंदे, डॉ.नरेश कुलकर्णी व चमूने परिश्रम घेतले.