चोरीची तांब्याची तार विकणारे तिघे गजाआड

अमरावती जिल्हय़ातून केली होती तार लंपास.

अकोला: अमरावती जिल्हय़ातील वलगाव येथून तांब्याची तार चोरून ती अकोल्यातील टिळक रोडवर विकण्याच्या प्रयत्नात असलेल्या तिघा जणांना कोतवाली पोलिसांनी शुक्रवारी दुपारी अटक केली. टिळक रोडवरील वखारिया बिल्डिंगजवळ तांब्याची तार विकण्यासाठी तिघें जण आल्याची माहिती कोतवाली पोलिसांना मिळाली. या ठिकाणी पोलिसांनी सापळा लावला. एमएच 0४ बीक्यू ७४६९ क्रमांकाच्या इंडिका कारमध्ये तांब्याची तार घेऊन आलेल्या शेख अनिस शेख अफजल (३२), इकरामोद्दीन तमीजोद्दीन (४0) आणि शेख समीर शेख अकील (२४ तिघेही रा. बाळापूर) यांना अटक केली. गडाम राजीक हा फरार झाला. आरोपींना कोतवाली पोलीस ठाण्यात आणल्यावर त्यांची चौकशी केली असता, शेख आबीद, शेख अलीम (रा. बाळापूर), अण्णा नामक इसम (रा. बोरगाव मंजू), साजीद, पप्पू व बबलू नामक इसमांनी अमरावती जिल्हय़ातील वलगाव येथून १ क्विंटल ६७ किलो तांब्याची तार चोरली आणि एका शेतात दडवून ठेवल्याची माहिती आरोपींनी पोलिसांना दिली. परंतु तांब्याची तार चोरणार्‍या आरोपींना वलगाव पोलिसांनी अटक केली. यातील आरोपी अण्णा हा चोरी करताना जळाल्याने तो सर्वोपचार रुग्णालयात भरती आहे. त्याच्याकडून गुडाम राजीक याला तांब्याच्या तारेची माहिती मिळाली आणि त्याने या तारेची विल्हेवाट लावण्यासाठी सांगितले. त्यानुसार गुडाम राजीकने आम्हा तिघांना ही माहिती दिली. १७ जून रोजी आम्ही चौघांनी वलगाव येथून तांब्याची तार इंडिका कारमध्ये टाकून अकोल्यात आणल्याची माहिती पोलिसांना दिली.