अकोला: जिल्हा परिषद अध्यक्ष व उपाध्यक्ष पदांच्या निवडणुकीत वर्चस्व राखत वंचित बहुजन आघाडीने सोमवारी विजय मिळविला. अध्यक्षपदी संगीता अढाऊ व उपाध्यक्षपदी सुनील फाटकर विजयी झाले. त्यामुळे जिल्हा परिषदेत 'वंचित' च्या विजयाचे फटाके फुटले असून , महाविकास आघाडीचा फज्जा उडाला.
पुढील अडीच वर्षांच्या कालावधीसाठी अकोला जिल्हा परिषद अध्यक्ष व उपाध्यक्ष पदांची निवडणूक १७ ऑक्टोबर रोजी घेण्यात आली. त्यामध्ये विद्यमान सत्ताधारी वंचित बहुजन आघाडीच्या संगीता अढाऊ यांची अध्यक्षपदी व उपाध्यक्षपदी सुनील फाटकर यांनी विजय मिळविला. दोन्ही पदांवर महाविकास आघाडीच्या उमेदवांचा पराभव झाला. अध्यक्षपदाच्या निवडणुकीत 'वंचित' च्या संगीता अढाऊ यांना २५ व महाविकास आघाडीच्या किरण अवताडे मोहोड यांना २३ मते मिळाली.
तर उपाध्यक्षपदाच्या निवडणुकीत 'वंचित' चे सुनील फाटकर यांना २५ आणि महाविकास आघाडीचे अपक्ष व विद्यमान सभापती सम्राट डोंगरदिवे यांना २३ मते मिळाली. अध्यक्ष व उपाध्यक्षपदी विजय मिळविल्यानंतर वंचित बहुजन आघाडीच्यावतीने पदाधिकारी व कार्यकर्त्यांनी नीळ व गुलाल उधळीत आणि फटाक्यांची आतषबाजी करीत विजयाचा जल्लोष करण्यात आला.