- अतुल जयस्वालअकोला - दक्षिण मध्य रेल्वेने प्रवाशांचा वाढता प्रतिसाद लक्षात घेता दक्षिण मध्य रेल्वेने अकोला-तिरुपती-अकोला विशेष एक्स्प्रेसला मुदतवाढ देण्याचा निर्णय घेतला आहे. आठवड्यातून एकदा असलेली ही रेल्वे आता २९ सप्टेंबरपर्यंत धावणार आहे.
नांदेड रेल्वे विभाग कार्यालयाकडून प्राप्त माहितीनुसार, ०७६०६ अकोला-तिरुपती ही साप्ताहिक गाडी ७ जुलै ते २९ सप्टेंबर २०२४ या कालावधीत दर रविवारी ८:१० वाजता अकोला स्थानकावरून रवाना होऊन दुसऱ्या दिवशी ६:२५ वाजता तिरुपती स्थानकावर पोहोचणार आहे.
०७६०५ तिरुपती-अकोला ही साप्ताहिक गाडी ५ जुलै ते २९ सप्टेंबर २०२४ या कालावधीत दर शुक्रवारी १२:३० वाजता तिरुपती स्थानकावरून प्रस्थान करून दुसऱ्या दिवशी अकोला स्थानकावर १२:१५ वाजता येणार आहे. या गाडीच्या अप व डाऊन अशा एकूण २६ फेऱ्या होणार आहेत. या रेल्वेला दोन महिन्यांची मुदतवाढ मिळाल्याने अकोलेकर प्रवाशांना तिरुपतीला जाणे शक्य होणार आहे.