मास्क न वापरणाऱ्या १९९ जणांना दंड,
अकोला : शहरासह जिल्हाभरात कोरोनाचे भीषण संकट घोंगावत असल्याने पोलिसांनी आता कारवाईला सुरुवात केली असून रविवारी पहाटेपासूनच पोलिसांनी वीणा मास्क फिरणारे, विनाकारण फिरणारे तसेच सोशल डिस्टन्सिंगचे पालन न करणाऱ्या आस्थापनांवर पोलीस अधीक्षकांच्या आदेशाने विविध पोलीस ठाण्यात गुन्हे दाखल करण्यात आले आहेत. त्यांच्याकडून सुमारे २३ हजार रुपयांचा दंड वसूल करण्यात आला आहे.
राज्यभर कोरोनाचे रुग्ण मोठ्या प्रमाणात वाढत आहेत. त्यामुळे मुख्यमंत्र्यांनी ब्रेक द चेनअंतर्गत कडक निर्बंध लागू केले आहेत. अकोला शहरासह जिल्ह्यातही कडक निर्बंध लावण्यात आले आहेत; मात्र तरीही काही नागरिक या निर्बंधांना न जुमानता विनाकारण बाहेर फिरत असल्याचे समोर आले. नागरिकांनी विनाकारण फिरण्याचा सपाटाच सुरू केला. मॉर्निंग वॉक, इव्हिनिंग वॉक यासह केवळ लॉकडाऊन कशा प्रकारे आहे हे पाहण्यासाठी बाहेर नागरिक निघत आहेत. याची माहिती पोलीस अधीक्षकांना मिळाल्यानंतर त्यांनी शहरात मॉर्निंग वॉक करणाऱ्यावर कारवाई केली. त्यानंतर मास्क न वापरणाऱ्या १९९ जणांवर दंडात्मक कारवाई करण्यात आली. सोशल डिस्टन्सिंगचे पालन न करणाऱ्या ३ आस्थापनांवर गुन्हे दाखल करण्यात आले आहे. तसेच विनाकारण बाहेर फिरणाऱ्या १९ वाहनचालकांवर पोलिसांनी कारवाई केली आहे. अशा प्रकारे एकूण २२१पेक्षा अधिक जणांवर कारवाई करून सुमारे २२ हजार रुपयांचा दंड वसूल करण्यात आला आहे. ही कारवाई पोलीस अधीक्षक जी श्रीधर, अतिरिक्त पोलीस अधीक्षक मोनिका राऊत, पोलीस उपअधीक्षक सचिन कदम, स्थानिक गुन्हे शाखा प्रमुख शैलेश सपकाळ, विशेष पथकाचे प्रमुख विलास पाटील यांच्या मार्गदर्शनात करण्यात आली.