अकोला- महानगरपालिका प्रशासनाने शहरात अवैध नळ जोडण्यांची शोध मोहीम राबविली आहे. या मोहिमेतून महापालिकेने ८ महिन्यांमध्येच ७२.६२ लाख रुपयांची दंड वसुली करण्यात आली. विशेष म्हणजे, २0१३-१४ या आर्थिक वर्षात मनपाला अवैध नळ जोडणीसाठी ७.४0 लाख रुपयांचाच दंड वसूल करता आला होता. अकोला शहराला महान येथील काटेपूर्णा प्रकल्पातून दररोज ६.५ कोटी लीटर पाण्याचा पुरवठा होतो. शहरातील ३५ हजार नळ जोडणीधारकांना हे पाणी पुरविल्या जाते, अशी नोंद महापालिका प्रशासनाकडे आहे. याउलट शहरात अवैध नळ जोडणीधारकांची संख्या त्यापेक्षा अधिक म्हणजे जवळपास ४९ हजारांच्या घरात आहे. महापालिका प्रशासनाकडून अवैध नळ जोडणीची शोध मोहीम नेहमीच राबविली जाते, मात्र यापूर्वी कधीही मनपा प्रशासनाला १0 लाखांच्यावर दंड वसुली करता आली नाही. मोठय़ाप्रमाणावर अवैध नळ जोडण्या असतानाही प्रशासनाचा दंड वसुलीचा आकडा वाढत नसल्याची बाब गांभीर्याने घेत यावर्षी मात्र नळ जोडणी शोध मोहीम अधिक गांभीर्याने राबविण्यात आली. प्रसंगी अवैध नळ जोडणीधारकांची पोलीस तक्रारही मनपा प्रशासनाच्यावतीने करण्यात आली. त्यामुळेच २0१३-१४ या वर्षात अवैध नळ जोडणी शोध मोहिमेतून केलेल्या ७.४0 लाख रुपयांच्या वसुलीचा आकडा यावर्षी तब्बल ७२.६२ लाखांवर पोहोचला आहे. या आर्थिक वर्षातील आणखी ४ महिन्यांचा अवधी शिल्लक आहे. अवैध नळ जोडणी शोध मोहीम सुरूच राहणार असल्याने दंड वसुलीचा आकडा १ कोटी रुपयांच्या वर जाण्याची शक्यता आहे.
अवैध नळ जोडणीसाठी ७२ लाखांचा दंड
By admin | Updated: December 15, 2014 01:18 IST