संगमनेर : सकल हिंदू समाजाच्या वतीने मंगळवारी (दि.०६) संगमनेर शहरात भगवा मोर्चा काढण्यात आला आहे. यात हिंदू बांधव मोठ्या संख्येने सहभागी झाल्याने मोर्चाला विराट स्वरुप प्राप्त झाले. लालबहादूर शास्त्री चौकातून (संगमनेर नगरपरिषदेजवळ) सकाळी दहा वाजेच्या सुमारास मोर्चाला सुरूवात झाली. शहरातील मुख्य मार्गांवरून मोर्चा नवीन नगर रस्त्यावरील यशवंतराव चव्हाण प्रशासकीय भवनावर मोर्चा नेण्यात येणार आहे.
संपूर्ण संगमनेर शहरात कडकडीत बंद पाळण्यात आला आहे. तसेच तालुक्याच्या ग्रामीण भागातील अनेक गावांमध्ये बंद असून मोर्चात संगमनेर शहर आणि तालुक्याच्या ग्रामीण भागातील हिंदू बांधव मोठ्या संख्येने सहभागी झाले आहेत. गेली अनेक वर्षे हिंदू समाजावर होणाऱ्या अन्यायाच्या विरोधात लोकशाहीच्या मार्गाने मोर्चा काढण्यात आल्याचे आयोजकांनी सांगितले. सर्वसामान्य हिंदू कुटुंबे सकल हिंदू समाज म्हणून या मोर्चात रस्त्यावर उतरले आहेत. लालबहादूर शास्त्री चौक, बाजारपेठ, तेलीखुंट, सय्यद बाबा चौक, गवंडीपुरा कॉर्नर, मेन रोड, चावडी, अशोक चौक, मोमीनपुरा, छत्रपती शिवाजी महाराज, भारतरत्न डॉ. बाबासाहेब आंबेडकर स्मारक, संगमनेर बसस्थानक, नवीन नगर रस्ता येथून मोर्चा जाणार आहे.