श्रीगोंदेकरांनी ५७ वर्षात दिले अवघे चार आमदार

श्रीगोंद्याच्या ५७ वर्षाच्या राजकीय इतिहासात विधानसभेच्या अकरा निवडणुका झाल्या. यात चार दिग्गज नेत्यांच्या हातात आमदारकीची सत्ता दिली आहे. या काळात भौगौलिक व राजकीय स्थित्यंतरे झाली. यातून श्रीगोंद्याची राजकीय रणभूमी राज्याच्या पटलावर नेहमीच गाजत राहिली आहे.

मतदारसंघाचा इतिहास /बाळासाहेब काकडे । श्रीगोंदा : श्रीगोंद्याच्या ५७ वर्षाच्या राजकीय इतिहासात विधानसभेच्या अकरा निवडणुका झाल्या. यात चार दिग्गज नेत्यांच्या हातात आमदारकीची सत्ता दिली आहे. या काळात भौगौलिक व राजकीय स्थित्यंतरे झाली. यातून श्रीगोंद्याची राजकीय रणभूमी राज्याच्या पटलावर नेहमीच गाजत राहिली आहे.संयुक्त महाराष्ट्र चळवळीनंतर विधानसभा अस्तित्वात आली. १९६२ ला पहिला आमदार होण्याचा मान दलित नेते बाबूराव भारस्कर यांना मिळाला. त्यांनी १९६२ ते १९७७ या काळात सत्तेचा वजीर आपल्या ताब्यात ठेवला. १९७२ ला काँग्रेस पक्षाने त्यांना तिकीट नाकारले. यावेळी प्रभाकर शिंदे यांना उमेदवारी दिली. बाबूराव भारस्कर यांनी या निवडणुकीत पक्षादेश म्हणून शिंदे यांना पाठिंबा दिला तरी श्रीगोंदेकरांनी आमदारकीची माळ भारस्कर यांच्याच गळ्यात घातली. बाबूराव भारस्कर लोणीव्यंकनाथ येथे समाज मंदिरात असताना त्यांना मंत्रिपदाची शपथ घेण्यासाठी मामलेदार तार घेऊन लोणीव्यंकनाथला आले. मुंबईला जाण्यासाठी ना पैसे.. ना अंगावर कपडे...त्यावेळी स्व.शिवाजीराव जंगले यांचे वडील कान्होजी जंगले यांनी भारस्कर यांना कपडे व प्रवासासाठी १०० रुपये दिले. भारस्कर मंत्रिपदाची शपथ घेण्यासाठी मुंबईला रवाना झाले. १९६५ च्या सुमारास तालुक्यातील काष्टी परिसरातील १५-१६ गावांमध्ये घोडचे पाणी आले. दुष्काळी भागातील घोडचा पट्टा ओयासिस झाला. सन १९७२ ला ढोकराईच्या माळरानावर शिवाजीराव नागवडे यांनी श्रीगोंदा सहकारी साखर कारखान्याच्या माध्यमातून विकासाचे धुराडे पेटविले. १९७७ ला शिवाजीराव नागवडे यांना आमदारकीची संधी मिळाली. मात्र अडीच वर्षात विधानसभेच्या निवडणुका झाल्या. काँग्रेस विचारसरणीच्या राजकारणाला श्रीगोंदेकरांनी छेद देत बबनराव पाचपुते यांच्याकडे आमदारकीची सत्ता दिली. पाचपुते १९८० ते १९९५ आमदार राहिले. मात्र शिवाजीराव नागवडे यांनी पाचपुतेंचा राजकीय पिच्छा सोडला नाही. १९९५ च्या विधानसभा निवडणुकीत पाचपुतेंचा त्यांनी पराभव केला. त्यानंतर पाचपुतेंनी पुन्हा पंधरा वर्षे म्हणजे २०१४ पर्यंत आपणाकडे आमदारकी शाबूत ठेवली.कुकडीचे पाणी अंगणी आले. भीमा, घोड नदीवर बंधारे झाले. दुष्काळी तालुक्याची ओळख पाणीदार तालुका म्हणून झाली. कुकडी, साईकृपा साखर कारखान्याची धुराडी पेटली. भाकरीभोवती फिरणारे राजकारण साखरेभोवती फिरू लागले. प्रचारातील सायकल, बैलगाडी, ट्रॅक्टर गेले. अलिशान गाड्यांचा धुराडा उडू लागला. पुन्हा कुकडी, घोडचा पाणी प्रश्न बदलत्या काळात ऐरणीवर आला आहे. राजकारणाचे चंगळवादी विश्व आले. तत्व, निष्ठा गेली. घोडेबाजार सुरू झाला. रात्रीत झेंडे बदल होऊ लागले. त्यामुळे नेत्यांची झोपच संपली. २०१४ मध्ये माजी मंत्री बबनराव पाचपुते यांनी राष्टवादीचे नेते शरद पवार यांना सोडचिठ्ठी दिली. शरद पवार यांनी नागवडे, जगताप यांची मूठ बांधून बबनराव पाचपुते यांचा पराभव केला. आमदार राहुल जगताप या युवा नेतृत्वाचा उदय श्रीगोंद्याच्या रणभूमीवर झाला. होम टु होम प्रचार संपला. सोशल मीडियावरच्या दिखाऊ व विकाऊ प्रचाराची सुगी सुरू झाली आहे. अशा परिस्थितीत पुन्हा राजकीय प्रतिष्ठा आणि अस्तित्वासाठी २०१९ चा महामुकाबला सुरू झाला. या मुकाबल्यात कोणाला उमेदवारी? कुणाच्या हाती बंडाचे निशाण? याविषयी सर्वांना उत्सुकता आहे.सायकल आणि शंभर रुपये बाबूराव भारस्कर हे मूळ शेवगावचे. एक सायकल आणि शंभर रुपये घेऊन याच भांडवलावर १५ आमदारकीची सत्ता भोगली. समाजकल्याणमंत्री झाले. सत्तेच्या माध्यमातून पैसा न कमविता माणसाला माणूस जोडण्याचे काम केले. माजीमंत्री बबनराव पाचपुते यांनी  १९८० ला बुलेटवर प्रचार केला. आमदारकीची सत्ता मिळवली. या प्रवासात पाचपुतेंनी अनेक प्लॅटफॉर्म बदलले. १९८० ला बबनराव पाचपुते हे अविवाहित होते. ते आमदार झाले. २०१४ ला अविवाहित आमदार म्हणून राहुल जगताप यांनी नवा इतिहास रचला. श्रीगोंद्यातील आमदार असे..१९६२ : बाबूराव भारस्कर१९७७ : शिवाजीराव नागवडे १९८० : बबनराव पाचपुते १९९५ : शिवाजीराव नागवडे १९९९ : बबनराव पाचपुते २०१४ : राहुल जगताप