शिर्डी : राज्य सरकारमधील प्रमुख पक्ष असलेल्या शिवसेना, काँग्रेस आणि राष्ट्रवादी या तीन पक्षांच्या समन्वय समितीत निर्णय झाल्याशिवाय औरंगाबादच्या नामांतराचा विषय मंत्रिमंडळाच्या बैठकीत येणार नाही. औरंगाबादऐवजी संभाजीनगर ही नामांतराची भूमिका शिवसेनेची आहे, सरकारची नाही, अशा शब्दात राष्ट्रवादीचे ज्येष्ठ नेते खासदार प्रफुल्ल पटेल यांनी भूमिका स्पष्ट केली.
पटेल यांनी शनिवारी शिर्डीत येऊन साईबाबांचे दर्शन घेतले. साईबाबा संस्थानचे मुख्य कार्यकारी अधिकारी कान्हुराज बगाटे यांनी साई संस्थानच्यावतीने पटेल यांचा सत्कार केला. यावेळी राष्ट्रवादीचे ज्येष्ठ नेते रमेश गोंदकर, अमित शेळके, संदीप सोनवणे, दीपक गोंदकर आदींची उपस्थिती होती. पटेल म्हणाले की, राज्यात तीन पक्षांचे आघाडी सरकार आहे. सरकार चालवण्यासाठी काँग्रेस, राष्ट्रवादी आणि शिवसेना या तीन पक्षांच्या प्रमुख नेत्यांची एक समन्वय समिती आहे. समन्वय समितीत नामांतराच्या विषयावर एकमत झाल्याशिवाय हा विषय मंत्रिमंडळाच्या बैठकीत येणार नाही. समन्वय समितीत चर्चा होऊन या वादावर तोडगा निघेल. औरंगाबादचे संभाजीनगर नामांतर व्हावे, ही शिवसेनेची बऱ्याच वर्षांची मागणी आहे. शिवसेनेचे नेते औरंगाबादला संभाजीनगर म्हणत असले तरी ती भूमिका सरकारची नाही.
..............
भंडारा घटनेची चौकशी व्हावी
भंडारा येथील रुग्णालयात घडलेली घटना अतिशय दुर्दैवी आहे. घटनेची सखोल चौकशी झाली पाहिजे. राज्याचे आरोग्य मंत्री राजेश टोपे यांनी ही घटना गांभिर्याने घेऊन राज्यातील इतर रुग्णालयात अशा घटनांची पुनरावृत्ती होऊ नये, यासाठी उपाययोजना कराव्यात. पेट्रोल, डिझेल आणि गॅसचे दर आंतरराष्ट्रीय पातळीवरील देशाच्या तुलनेत भारतात अधिक महाग असल्याने त्यात तातडीने कपात करून देशातील नागरिकांना केंद्र सरकारने न्याय द्यावा, असेेही पटेल म्हणाले.