शेवगाव : ‘जागेअभावी शेवगावचा आठवडे बाजार रस्त्यावर’ या आशयाचे वृत्त प्रसिद्ध करून ‘लोकमत’ने नगरपरिषद प्रशासनाचे लक्ष वेधले होते. आठवडे बाजार स्थलांतर विषयी बुधवारी ( दि.१० ) रोजी नगरपरिषद कार्यालयात दुपारी बारा वाजता अधिकारी व देवस्थानचे विश्वस्त यांच्यात बैठक पार पडली आहे.
आठवडे बाजार नवीन जागेवर खंडोबामाळ येथे पुढील महिन्यात स्थलांतरित करण्यात येणार आहे. यासंदर्भात झालेल्या बैठकीत प्रशासक तथा प्रांताधिकारी देवदत्त केकाण, मुख्याधिकारी अंबादास गर्कळ, प्रांत कार्यालयातील अव्वल कारकून नितीन बनसोडे, खंडोबा देवस्थान ट्रस्टचे अध्यक्ष छबूराव मिसाळ यांच्यासह सर्व विश्वस्त उपस्थित होते.
देवस्थान ट्रस्टच्या अटी शर्तींवर चर्चा होऊन प्रशासन व देवस्थान विश्वस्त यांच्यात एकमत होऊन देवस्थानच्या मालकीची जागा आठवडे बाजारासाठी देण्याचे ठरले आहे. याबाबत लवकरच लेखी करार होऊन नंतर पुढील महिन्यात आठवडे बाजाराचे स्थलांतर होणार आहे.
शेवगाव येथील आठवडे बाजार शहराच्या मध्यवस्तीत बसस्थानकापासून अवघ्या काही अंतरावर इनामदार यांच्या खासगी जागेत भरतो आहे. बाजारासाठी सदरची जागा अपुरी पडू लागल्याने व्यापाऱ्यांनी थेट नेवासा रस्ता, मिरी रस्त्यावरच शेतमाल विक्री करण्यास सुरूवात केली आहे. त्यामुळे ती दुकाने रहदारीला मोठा अडथळा ठरत आहेत. तसेच अवघ्या काही अंतरावर बसस्थानक असल्याने स्थानकात मंडळाच्या येणाऱ्या-जाणाऱ्या गाड्यांच्या दिवस भरातील ४५० फेऱ्या, नेवासा, नगर, मिरी, पैठण, पाथर्डीकडे जाणारी वाहतूक यामुळे वाहतूक कोंडी होते आहे. यावर ‘लोकमत’ने वृत्त प्रसिद्ध करून प्रशासनाचे लक्ष वेधले होते. पुढील महिन्यात आठवडे बाजार खंडोबामाळ येथे भरणार असल्याने होणारी वाहतूक कोंडी सुटणार असून बाजारात माल विक्रीसाठी येणाऱ्या व्यापाऱ्यांना मुबलक प्रमाणात जागा उपलब्ध होणार आहे. याचबरोबर अन्य तालुक्यातील येणाऱ्या व्यापाऱ्यांची संख्या वाढणार आहे.