अहमदनगर : पुण्यश्लोक अहिल्याबाई होळकर यांचा जन्म आपल्या नातवाच्या (रोहित पवार) मतदारसंघात झाला आहे, असे बोलून नातवाचा मतदारसंघ हा अहिल्यादेवींपेक्षा श्रेष्ठ आहे, असेच शरद पवार यांनी अप्रत्यक्षपणे सूचित केले आहे. त्यांनी असे बोलणे, हा अहिल्यादेवी यांचा अपमान आहे. शरद पवार यांची जीभ घसरलीय, असेच म्हणणे योग्य ठरेल, अशी टीका भाजपचे प्रदेश उपाध्यक्ष, माजी मंत्री प्रा. राम शिंदे यांनी केली आहे. जेजुरी येथे पुण्यश्लोक अहिल्यादेवी होळकर यांच्या पुतळ्याचे राष्ट्रवादी कॉंग्रेसचे अध्यक्ष शरद पवार यांच्या हस्ते दोन दिवसांपूर्वी अनावरण झाले. या कार्यक्रमात बोलताना पवार यांनी केलेल्या भाषणाचा काही अंश सोशल मीडियावर व्हायरल झाला आहे. त्यामधील वाक्य पकडत आता प्रा. शिंदे यांनी शरद पवार यांच्यावर निशाणा साधला आहे.
याबाबत चौंडी (ता. जामखेड) येथे माध्यमांशी बोलताना प्रा. शिंदे म्हणाले, जेजुरी येथे पुण्यश्लोक अहिल्याबाई होळकर यांच्या पुतळ्याचे अनावरण शरद पवार यांच्या हस्ते झाले. यावेळी पवार यांनी नातवाच्या प्रेमापोटी एक वक्तव्य केले. अहिल्यादेवींचा जन्म रोहित पवार यांच्या मतदारसंघात झाला आहे, असे सांगून, नातवाचा मतदारसंघ श्रेष्ठ आहे, हे सांगण्याचा शरद पवार यांच्याकडून प्रयत्न झाला आहे. शरद पवार हे राजकारणात, लोकशाहीत अर्धशतक पूर्ण करणारे नेते आहेत. त्यांच्या तोंडातून जे वाक्य गेले, ते अनवधानाने गेले असेल किंवा त्यांची जीभ घसरली असेल, असे मला वाटते. परंतु, अहिल्यादेवींचा असा नामोल्लेख करणे ही गंभीर चूक असून हा अवमान आहे.